.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 272
Hüküm no: 363
Orijinal metin no: [204-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yasef v. Şemon’un ölen babasının ortak olduğu evle ilgili davasından bedel karşılığında sulh olduğu

Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkin Yasef v. Şemon nâm Yahudi mahfil-i kazâda işbu [râfi‘-i] hâze’s-sifr Yapole v. Basyas nâm Yahudi muvâcehesinde takrîr-i kelâm ve ta‘bîr ani’l-merâm edip mahalle-i mezbûrede vâki‘ bir tarafı Şemon nâm Yahudi mülkü ve üç tarafı tarîk-i âm ile mahdûd ve mümtâz olan menzilin nısf-ı şâyi‘i mezbûr Yapole’nin olup ve nısf-ı şâyi‘i bundan akdem mürd olan babam mezbûr Şemon’un mülküdür, da‘vâ ve taleb edip suâl olundukda mezbûr Yapole müdde‘â-yı mezbûru inkâr ile cevâb verip beynimizde münâza‘ât-ı kesîre ve muhâsamât-ı şedîde vâkı‘a oldukda muslihûn tavassut edip mâbeynimizi nakd-i râyic fi’l-vakt yirmi iki bin akçeye inkârdan sulh ettiklerinde, ben dahi sulh-ı mezbûru kabûl ve bedel-i sulh olan meblağ-ı mezbûr yirmi iki bin akçeyi mezbûr Yapole yedinden bi’t-tamâm ahz u kabz edip min ba‘d husûs-ı mezbûra müte‘allik da‘vâ ve husûmât ve eymândan mezbûr Yapole’nin zimmetini ibrâ-i âmm-ı kātı‘ü’n-nizâ‘ ile ibrâ ve ıskāt eyledim deyû bi’t-tav‘ ve’r-rızâ ikrâr ve i‘tirâf ettikde, mukırr-ı merkūmun ikrâr-ı meşrûhunu el-mukarru lehü’l-mezbûr Yapole bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Muharremi’l-harâm li sene hamsîn ve elf.


Şuhûdü’l-hâl: Mahmud b. Mehmed, Mehmed Çelebi b. Mustafa el-İmâm, Mehmed Halîfe b. İbrahim el-Müezzin, Mosi v. Manpanikon?, Menahim v. Menahim, Kodî v. Menahim