.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 272
Hüküm no: 364
Orijinal metin no: [204-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Vefat eden Mustafa Bey b. Kurd’un terekesini kız kardeşlerinin teslim aldıkları

Mahmiye-i İstanbul’da Bâb-ı Cedîd kurbunda vâki‘ Çukur mahalle sâkinlerinden iken müteveffâ olan Mustafa Bey b. Kurd’un kız karındaşları ve bi’l-ihsâr vâriseleri olup vilâyet-i Rumeli’nde Pekin? kazâsına tâbi‘ Vencan nâm karye sâkinelerinden Asafe bt. Kurd ve diğer kız karındaşı Fâtıma bt. Kurd tarafından husûs-ı âtiye vekîl olup vekâleti mezbûreyi ma‘rifet-i şer‘iyye ile ârifân Yakub Bey b. Mehmed ve Hasan Beşe b. Malkoç nâm kimesneler şehâdetleri ile sâbite olan Sağır [205] Ahmed b. Kasım meclis-i şer‘de mahmiye-i mezbûrede mahalle-i mezkûre sâkinlerinden hâlen Tersâne-i âmire bahçesi üstâdı olan işbu hâmilü’l-kitâb fahrü’l-emâsil ve’l-akrân Mustafa Ağa b. Ali mahzarında her biri asâleten ve vekâleten bi’t-tav‘ ikrâr ve i‘tirâf edip mûrisimiz müteveffâ-yı mezbûr Mustafa Bey’in muhallefâtından merkūm üstâd Mustafa Ağa yedinde yirmi yedi bin nakid akçe ve elli bir bin kıymetli ber-mûceb-i defter eşyâsı olmağın zikr olunan yirmi yedi bin akçeyi ve ber-mûceb-i defter cemî‘ eşyâsını mezkûr üstâd Mustafa Ağa yedinden bi’t-tamâm ve’l-kemâl ahz u kabz edip husûs-ı muhallefât-ı mezkûreye müte‘allik cemî‘ da‘vâ ve nizâ‘dan zimmetini ibrâ-i âmm-ı kātı‘ü’n-nizâ‘ ile ibrâ ve ıskāt eyledik, ba‘de’l-yevm husûs-ı mezkûre müte‘allik her birimizden asâleten ve vekâleten da‘vâ sâdıra olursa lede’l-hükkâmi’l-kirâm mesmû‘a ve makbûle olmasın dediklerinde, mukırrân-ı mezbûrânı ikrâr-ı meşrûhlarında merkūm üstâd Mustafa Ağa bi’l-muvâcehe tasdîk etmeğin mâ vaka‘a bi’t-taleb ketb olundu. Tahrîren fî târihi’l-mezbûr.


Şuhûdü’l-hâl: Abdullah Efendi b. Nurullah el-İmâm, Osman Çavuş b. Abdullah, Ömer Beşe b. Hüdâverdi, Mustafa Çavuş b. Sefer, Halil Halîfe b. Şaban, Şaban Dede b. Eyyûb, el-Hâc Yunus b. Nuh ve gayruhüm mine’l-hâzırîn