.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 273
Hüküm no: 365
Orijinal metin no: [205-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hasköy halkının Pîr Mehmed Paşa Hamamı’nı işleten Ahmed Çelebi b. Muslu’dan memnun oldukları ve hamamdan ihrac edilmemesini talep ettikleri

Havâss-ı aliyye kazâsına tâbi‘ Hasköy nâm kasaba ahâlîsinden fahrü’l-akrân İbrahim Efendi b. Hüsrev el-İmâm ve Mehmed Halîfe b. Hayri el-Müezzin ve Mehmed Çelebi b. Mustafa el-İmâm ve Ahmed Efendi b. Abdi el-İmâm ve Mahmud Çelebi b. Mehmed es-Serrâc ve Mustafa Çelebi b. Halil es-Serrâc ve İbrahim Bey b. Yusuf el-Cündî ve Ebûbekir Çelebi b. Mehmed ve Ali b. Hüseyin ve Mehmed b. Bilal ve Mehmed Beşe b. Hasan ve Ali Çelebi b. Abdullah ve Abdülaziz b. Mehmed el-İmâm ve Muslu b. Veli ve Hüseyin Çavuş b. Ali [ve] Abdünnebi b. Veli ve Ahmed Bey b. Hasan el-Cündî ve Hüseyin b. Pîrî ve Mehmed Halîfe b. İbrahim el-Müezzin ve Ahmed Ağa b. Abdülmennân ve sâir cem‘-i gafîr ve cem‘-i kesîr meclis-i şer‘-i hatîr-i lâzımü’t-tevkīrde yine kasaba-i mezbûrede Pîrî Paşa mahallesinde vâki‘ merhûm Pîr Mehmed Paşa Hamamı’nda hamamcı olan Ahmed Çelebi b. Muslu nâm kimesne mahzarında her biri takrîr-i kelâm edip mezbûr Ahmed Çelebi hamam-ı mezbûrun suyun ısıcak edip ve peştemali ve döşemesinde noksanı olmadığından mâ‘adâ hizmetinde kemâl-i mertebe istikāmeti olup hamam-ı mezbûrdan ihrâc olunmaması matlû[bumuzdur] dediklerinde fi’l-hakīka merkūm Ahmed Çelebi hamam-ı mezbûrun hizmetinde [206] her vechile kemâl mertebe istikāmet üzre olup zikr olunan vakfın icâresin vakf-ı mezbûrun zâbitlerine edâ ettiği mukarrer ve muhakkak olmağın hamam-ı mezbûreden ihrâc olunmamasına tenbîh birle mâ hüve’l-vâki‘ bi’t-taleb ketb olundu. Tahrîren fî evâili Muharremi’l-harâm li sene hamsîn ve elf.


Şuhûdü’l-hâl: ( )