|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 274 Hüküm no: 366 Orijinal metin no: [206-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vefat eden Mustafa Bey b. Kurd’un vakıf mütevellîsinin izni olmadan yaptığı ve vârislerine intikal eden evdeki hisselerin Mustafa Ağa’ya devredildiği
Mahmiye-i Kostantıniyye hısnı ebvâbından Bâb-ı Cedîd kurbunda vâki‘ Çukur mahallesinde arsası merhûm Molla Lütfi Vakfı’ndan olup bir tarafı Üstâd Mustafa Ağa menziline ve bir tarafı Alaca Mustafa Ağa menziline ve bir tarafı Fâtıma Hâtun tasarrufunda olan menzile ve bir tarafı tarîk-i âmma müntehî menzilin icâre-i mu‘accele-i mu‘ayyene ve yevmî bir akçe ücret-i müeccele ile müste’ciri olan müteveffâ Mustafa Bey b. Kurd’un verâseti li ebeveyn kız karındaşı Asafe ve li eb kız karındaşı Fâtıma bt. Kurd’a ve ibn-i ammi üstâd Mustafa Ağa’ya münhasıra olduğu şer‘an mütehakkik oldukdan sonra mezbûre Asafe asâleten ve diğer kız karındaşı Fâtıma bt. Kurd tarafından husûs-ı âti’l-beyâna vekîl olup vekâleti mezbûreyi ma‘rifet-i şer‘î ile ârifân olan Yakub Bey b. Mehmed ve Hasan Beşe b. Malkoç şehâdetleriyle şer‘an sâbite olan zevci Sağır Ahmed b. ( ) nâm [kimesne] meclis-i şer‘-i şerîfde işbu hâfızü’l-kitâb ibn-i ammi olup hâlen Tersâne-i âmire bahçesi üstâdı fahrü’l-akrân mezbûr üstâd Mustafa Ağa b. Ali mahzarında her biri asâleten ve vekâleten ikrâr ve takrîr-i kelâm edip mûrisimiz müteveffâ-i mezkûr menzil-i mârrü’z-zikrde kendi mâlıyla nefsiyçün tahmînen yüz doksan bin akçe binâ ihdâs ve işhâd edip ba‘dehû bilâ veled fevt oldukda izn-i mütevellî yoğiken binâ olunmuşdur deyû hâlen mütevellî-i vakf-ı mezbûr olan Mehmed Efendi kal‘ı lâzımdır deyû bizimle nizâ‘ edip kal‘ı dahi cânib-i vakfa zarar olup taraf-ı vakıfdan maklû‘an kıymetinin edâsı lâzım geldikden vakf-ı mezbûrda edâsına müsâ‘ade olmamağın binâ-i mezkûr icâre-i mu‘accelesine mahsûb olmak üzre menzil-i mezkûru mütevellî-i vakf-ı merkūmdan mezbûr üstâd Mustafa Ağa ve biz asâleten ve vekâleten ale’l-iştirâki’s-seviyy tefevvuz ve istîcâr etmişidik, el-hâletü hâzihî menzil-i mezkûrda bizim tasarrufumuzda olan sülüsân hissemizi merkūm üstâd Mustafa Ağa’ya izn-i mütevellî-i mezbûr ile beş yüz kâmil riyâlî guruş bedel mukābelesinde ferâğ ve tefvîz edip ol dahi tefevvuz ve kabûl ettikden sonra mukābele-i ferâğım olan beş yüz riyâlî hâzır bi’l-meclis olan el-Hâc Kasım b. ( ) olan beş yüz kâmil riyâlî guruş deynimize cümlemizin rızâsıyla havâle eyledik ba‘de’l-yevm menzil-i mezkûrun küllîsi mûmâ-ileyh üstâd Mustafa Ağa’nın hakk-ı müfevvazıdır bizim aslâ ve kat‘â alâka ve medhalimiz yokdur keyfemâ yeşâ mutasarrıf olsun dediklerinde mukırrân-ı mezbûrânı ikrâr-ı meşrûhlarında el-mukarru lehü’l-mezbûr üstâd Mustafa Ağa vicâhen ve şifâhen tasdîk etmeğin mâ vaka‘a bi’t-taleb ketb olundu. Tahrîren fî târihi’l-mezbûr. [Şuhûdü’l-hâl: ( )]
|