.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 275
Hüküm no: 367
Orijinal metin no: [207-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mustafa b. Hamza’nın harap durumda olan vakıf evin tasarruf hakkından ferâğat ederek vakfa terk ettiği

Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkine iken müteveffiye olan Fâtıma bt. Hüseyin nâm hâtun hâl-i sıhhatinde mahalle-i mezbûrede vâki‘ iki tarafdan Mehmed b. Bilal mülkü ve bir tarafdan Osman Bey mülkü ve bir tarafdan vâdi ile mahdûd olup bir beyt-i süflî ve bir sofa ve muhavvatayı müştemil menzili vakf [ve] süknâsını evvelâ nefsine ba‘dehâ Hayrünnisa nâm hâtuna ba‘dehâ evlâdına, ba‘dehüm Medîne-i Münevvere fukarâsına şart etmekle ber vech-i meşrûtiyyet mutasarrıf olan Mustafa b. Hamza nâm kimesne meclis-i şer‘de Haremeyn-i Şerîf[eyn] Vakfı’na bi’l-fi‘il mütevellî olan Mustafa Halîfe b. İbrahim nâm müteferrika tarafından tasdîk-i âti’l-beyâna vekîl olup bimâ hüve tarîkü’s-sübût şer‘an vekâleti sâbite olan Yusuf b. Abdullah mahzarında ikrâr-ı tâm ve takrîr-i kelâm edip mürûr-ı eyyâm ile menzil-i mezbûr harâba müşrif olup kābil-i süknâ olmayıp taraf-ı vakıfdan müsâ‘ade olmayıp ve benim dahi meremmete kudretim olmadığı ecilden menzil-i mezbûrun hakk-ı tasarrufunu hüsn-i ihtiyârım[la] vakfa fâriğ oldum, taraf-ı vakıfdan tâlib olana îcâr olunsun dedikde, gıbbe’t-tasdîki’l-vicâhî bi’t-taleb ketb olundu. Tahrîren fî evâhiri Muharremi’l-harâm sene hamsîn ve elf.


Şuhûdü’l-hâl: Mahmud Çelebi [b.] Mehmed serrâc-ı hâssa, Şahin Bey [b.] Abdullah, İbrahim Efendi [b.] Hüsrev el-İmâm, Mehmed Halîfe [b.] Haydar el-Müezzin, Mehmed Çelebi b. Mustafa el-İmâm, Mehmed …?, Ahmed Çelebi b. Muslu, Mehmed b. Mehmed el-Müezzin, Osman [b.] Mustafa, [İ]brahim Çelebi [b.] Ahmed, Pîrî b. Rıdvan, Hasan Çelebi [b.] Pîrî, Osman [b.] Mustafa, Mahmud Bey [b.] Mirza, Ömer Halîfe b. Hüseyin câbi-i Pîrî Paşa, Ali b. Abdullah muhzır, Halil b. Muslihiddin, Hüseyin b. Abdullah