|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 276 Hüküm no: 369 Orijinal metin no: [207-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kadri Çelebi ile kardeşlerinin ölen babaları Hasan’ın evini sağlığında Emine bt. Hasan’a hibe ettiğini ikrârları
Havâss-ı aliyye kazâsına tâbi‘ Hasköy mahallâtından Ahmed Çelebi mahallesi sükkânından Kadri Çelebi b. Hasan ve li eb karındaşı Mahmud ve kız karındaşı Fâtıma mahfil-i kazâda menzil-i âti’l-beyâna vâzı‘atü’l-yed olan Emine bt. Hasan nâm hâtun mahzarında her biri bi-tav‘ihim ikrâr ve takrîr-i kelâm edip mahalle-i mezbûrede vâki‘ bir tarafı Mehmed Çelebi b. Mustafa mülkü ve bir tarafı tarîk-i âm ve iki tarafı bizim mülkümüz ile mahdûd ve mümtâz olan bir bâb ahırı ve bir bâb fevkānî oda ve tûlen ve arzan beş zirâ‘ havluyu müştemil olan menzili babamız mezbûr Hasan sıhhati hâlinde merkūme Emine’ye hibe-i sahîha-i şer‘iyye ile hibe ve temlîk ve teslîm edip ol dahi meclis-i hibede menzil-i mezbûru ittihâb ve kabz ve kabûl eylemişidi, el-hâletü hâzihî zikr olunan menzil merkūme Emine’nin mülk-i mevhûbudur, menzil-i mezbûrda [208] bizim aslâ alâka ve medhalimiz yokdur dediklerinde, mukırrûn-ı merkūmûnun ikrâr-ı meşrûhlarını el-mukarru leha’l-mezbûre Emine bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâmin min Saferi’l-hayr sene hamsîn ve elf.
Şuhûdü’l-hâl: Mehmed Çelebi b. Mustafa el-İmâm, Mahmud Çelebi b. Mehmed es-Serrâc, Ahmed Çelebi b. Muslu, Mehmed Çelebi b. Arslan, Mehmed Halîfe b. İbrahim, Musa b. Bilal, Abdi Debbağ, Ali Dede [b.] Hüseyin, Ali [b.] Abdullah muhzır
|