|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 278 Hüküm no: 372 Orijinal metin no: [208-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Agop v. Onnes’in namzedi olduğu Mezandane bt. Serkis adlı bâkire kız ile evlenmekten vazgeçtiği
Vilâyet-i Anadolu’da vâki‘ kasaba-i Eğin sükkânından Agop v. Onnes nâm Ermeni mahfil-i kazâda işbu râfi‘-i hâze’s-sifr Serkis v. Kirakoz nâm Ermeni muvâcehesinde takrîr-i kelâm edip bundan akdem mezbûr Serkis’in sadriye kızı Mezandane nâm bikri âyin-i bâtılımız üzre tezevvüc murâd edip namzed olmuşdum, el-hâletü hâzihî zikr olunan bikri tezevvücden ferâğat eyledim, husûs-ı mezbûra müte‘allik da‘vâ ve nizâ‘ım yokdur, eğer ba‘de’l-yevm benden veyâhud vekîlimden da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmaya dedikde mukırr-ı merkūm Agop’un ikrâr-ı meşrûhunu el-mukarru lehü’l-mezbûr Serkis bi’l-muvâcehe tasdîk ve tahkīk edicek mâ hüve’l-vâki‘ bi’t-taleb ketb olundu. Tahrîren fî evâsıtı Saferi’l-hayr sene hamsîn ve elf.
Şuhûdü’l-hâl: Marcan v. Vazan, Barhan v. Baztan, Ağazer v. Batran, Ağanes v. Andreyas, Ağas v. Gazal, Emircan v. Emrik, Murad [v.] Horik, Zirek [v.] Metrek, Mervanis [v.] Dostiyar
|