|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 279 Hüküm no: 375 Orijinal metin no: [209-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ali Çelebi b. Yusuf’un kullanılamaz durumdaki vakıf evi kirasına mahsûben kendi malıyla yeniden yaptırdığı; inşâat için harcanan miktarın keşfi
Medîne-i Hazret-i Ebâ Eyyûb el-Ensârî -aleyhi rahmetü Rabbihi’l-Bârî- muzâfâtından kasaba-i Hasköy’de vâki‘ Timurhan Çavuş Vakfı’ndan olup kasaba-i mezbûrede vâki‘ bir tarafı vakf-ı mezbûr ve bir tarafı Tâvun nâm Yahudi mülkü ve bir tarafı Ahmed Çelebi Vakfı ve bir tarafı tarîk-i âm ile mahdûd üç bâb tahtânî odayı müştemil olan menzilin icâre-i mu‘accele-i ma‘lûme ve yevmî üçer akçe ücret-i müeccele ile mutasarrıfı olan fahrü’l-akrân işbu sâhibü’l-kitâb Ali Çelebi b. Yusuf nâm kimesne meclis-i şer‘-i Ahmediyye’ye gelip takrîr-i kelâm edip vech-i mübeyyen üzre taht-ı tasarrufumda olan menzil, mürûr-ı eyyâm ve kürûr-ı şuhûr-i a‘vâm ile bi’l-külliye harâba müşrif olup aslâ kābil-i süknâ olmayıp ve vakf-ı mezbûrda dahi imâret ve meremmetine müsâ‘ade olmadığı cihetden vakf-ı mezbûre hâlen mütevellî olan Üstâd Mustafa Ağa b. Ali’den bundan akdem ben kendi mâlım ile icâre-i müecceleme mahsûb olmak üzre bir mikdâr akçe harc u sarf edip müceddeden ba‘zı ebniye ihdâs etmeğe me’zûn olmağla hâlen vech-i muharrer üzre bir bâb tahtânî [210] mahzen ve iki bâb dükkân ve iki bâb oda ve üç bâb fevkānî oda ve bir şehnişîn ve bir bâb matbah fırınıyla bile ve bir tahta-pûş ve dehlizi müştemil olan menzil binâ eylemişdir hâlen ihdâs eylediğim binâ ne mikdâr akçe harc u sarf eylemek ile olduğun takvîm ve tahmîn ettirmek murâd ederim, cânib-i şer‘-i kavîmden üzerine varılıp vâki‘ hâl keşf ve tahrîr olunmak matlûbumdur dedikde, cânib-i şer‘-i şerîfden bizzat ve hâssa mi‘mârlardan Üstâd el-Hâc Hasan b. Ömer nâm kimesne ve ebniye ve sukūf ahvâline vukūfları olup ve zeyl-i kitâbda mastûrü’l-esâmi olan bî-garaz müslimîn ile menzil-i mezbûra varılıp akd-i meclis-i şerî‘at-ı Mustafaviyye olundukda mütevellî-i vakf-ı mezbûr huzûrunda mi‘mâr-ı merkūm menzil-i mezbûrun cümle binâsını mesâha eyledikde tûlen yirmi bir zirâ‘ ve arzan on dört buçuk zirâ‘ bi-hesâb-ı şatrancî üç yüz beş zirâ‘ sakfı olup her zirâ‘ı yetmişer akçeden yirmi bir bin üç yüz elli akçe ve dolma duvarı bi-hesâb-ı mezbûr beş yüz kırk üç zirâ‘ olup her zirâ‘ı altmışar akçeden otuz iki bin beş yüz seksen akçe ve tahta döşeme tûlen ve arzan bi-hesâb-ı mezbûr iki yüz elli zirâ‘ olup her zirâ‘ı ellişer akçeden on iki bin beş yüz akçe ve tahta-pûş dehlizi ile bi-hesâb-ı mezbûr seksen zirâ‘ olup her zirâ‘ı ellişer akçeden dört bin akçe ve tûlen ve arzan bi-hesâb-ı mezbûr seksen sekiz zirâ‘ şişhâne tavanının her zirâ‘ı altmış akçeden beş bin iki yüz seksen akçe ve sâde tavanı bi-hesâb-ı mezbûr yetmiş zirâ‘ olup her zirâ‘ı ellişer akçeden üç bin beş yüz akçe ve tuğla döşemesi bi-hesâb-ı mezbûr iki yüz zirâ‘ olup her zirâ‘ı kırkar akçeden sekiz bin akçe ve bir sofa döşemesi bi-hesâb-ı mezbûr elli zirâ‘ olup her zirâ‘ı otuzar akçeden bin beş yüz akçe ve bir matbah fırınıyla bile on bin akçe ve iki sırça cam yüz ellişer akçeden üç yüz akçe ve iki sâde kapı ikişer yüz ellişer akçeden beş yüz akçe ve bir mükemmel masandıra yedi bin akçe ve def‘an iki mükemmel masandıra beş bin akçe ve üç kemerli kapı dörder yüz ellişer akçeden bin üç yüz elli akçe ve on dört kafesli pencere her biri kırk beşer akçeden altı yüz otuz akçe ve iki pencere parmaklı yüz ellişer akçeden üç yüz akçe ve bir mükemmel ocağına iki bin akçe ve dokuz billûr cam beşer yüz akçeden dört bin beş yüz akçe ve bir mükemmel şehnişîn dört bin akçe ve bir nerdübânına yedi yüz akçe bir çamaşırhânesine dört bin akçe ve bir kenîfine dört bin akçe ve tahtânîsinde dolma duvarı tûlen ve arzan bi-hesâb-ı mezbûr kırk sekiz zirâ‘ olup her zirâ‘ı altmışar akçeden iki bin sekiz yüz seksen akçe [211] ve döşeme tahta tûlen ve arzan bi-hesâb-ı mezbûr altmış sekiz zirâ‘ olup her zirâ‘ı kırkar akçeden iki bin yedi yüz yirmi akçe ve yirmi beş Karadeniz ve Birgi başlığı ve kürsü taşıyla dörder yüz ellişer akçeden on bir bin iki yüz elli akçe ve on yedi İznikmid direği başlığı ve kürsü taşıyla her biri yüz yirmişer akçeden iki bin kırk akçe ve iki yüz kırk üç ağa tahtası her biri yirmişer akçeden dört bin sekiz yüz altmış akçe ve dükkânlar döşeme tahtası tûlen ve arzan bi-hesâb-ı mezbûr otuz iki zirâ‘ olup her zirâ‘ı kırk akçeden bin iki yüz seksen akçe ve bir mahzen kapısına dört yüz akçe ve dükkânlar kenîfleri tûlen ve arzan bi-hesâb-ı mezbûr yirmi dört zirâ‘ olup her zirâ‘ı seksen akçeden bin dokuz yüz yirmi akçe cem‘an yüz altmış bin üç yüz kırk akçeye takvîm ve tahmîn ve bu mahalde bu makūle menzilin binâsı meblağ-ı merkūmdan eksik ile olmaz deyû mi‘mâr-ı mezbûr ve zeyl-i kitâbda mastûrü’l-esâmi olan bî-garaz müslimîn icmâ‘ ve ittifâk ettiklerinden sonra bundan akdem yine menzil-i mezbûrun nakzı için mukaddemâ tahmîn olunup sarf olunan akçe cem‘an yüz doksan bin üç yüz seksen dört akçe idüp vech-i meşrû‘ üzre râyic fi’l-vakt otuz bin kırk dört akçe harc u sarf olunursa müste’cir-i mezbûrun menzil-i merkūma sarf ettiği meblağ-ı mezbûr icâre-i mu‘accelesine mahsûb olmak üzre ettiği harc u sarfı mahallinde alâ vukū‘ihî keşf ve tahrîr olunup yed-i tâlibe def‘ olundu. Tahrîren fi’l-yevmi’s-sâmin min şehri Rebî‘ilevvel li sene hamsîn ve elf.
Şuhûdü’l-hâl: Ramazan Efendi b. Hasan el-İmâm, Abdullah Efendi b. Abdullah el-İmâm, Pîrî Bey b. İbrahim, Receb Beşe b. Abdullah er-Râcil, Kulu Beşe b. Yoğurtçu, Mustafa Çelebi b. Mehmed er-Râcil, Mahmud Çelebi b. ( ) serrâc-ı hâssa, Ömer Bey b. Mustafa serrâc-ı hâssa, İsa Beşe [b.] Ali er-Râcil, Mahmud [b.] Mirza el-Cündî, Mehmed Çelebi b. Mustafa el-İmâm, Mehmed b. İbrahim el-Müezzin, Ahmed Çelebi b. Muslu hammâmî
|