.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 281
Hüküm no: 376
Orijinal metin no: [211-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Süleyman Çelebi b. Ramazan’ın İsmihân Hâtun’un bağdaki hissesini satın aldığı iddiası, inkârı üzerine ihtilâfa düştükleri ve sulh oldukları

Mahmiye-i İstanbul’da Nişâncı-yı Atîk mahallesinde sâkine İsmihân bt. ( ) nâm hâtun tarafından husûs-ı âti’l-beyânı tasdîke vekîl olup mezbûreyi ma‘rifet-i şer‘iyye ile ârifân olan Mehmed Çelebi b. Mustafa el-İmâm ve diğer Mehmed Halîfe b. İbrahim el-Müezzin şehâdetleri ile vekâleti sâbite olan zevci Mustafa Subaşı b. Mehmed mahfil-i kazâda işbu râfi‘ü’l-kitâb Süleyman Çelebi b. Ramazan mahzarında bi’l-vekâle ikrâr ve takrîr-i kelâm edip Havâss-ı aliyye’ye tâbi‘ Hasköy mahallâtından Ahmed Çelebi mahallesinde vâki‘ lede’l-ahâlî ve’l-cîrân ma‘lûmü’l-hudûd olan bağımın dört sehimden bir sehmi müvekkilem mezbûrenin mülkü [212] olup mezbûr Süleyman Çelebi zikr olunan sehmi müvekkilem mezbûreden iştirâ eyledim suâl olunsun dedikde, gıbbe’s-suâl müvekkilem mezbûre inkâr ile cevâb verip beynimizde münâza‘ât-ı kesîre ve muhâsamât-ı şedîde vâkı‘a olmağla muslihûn tavassut edip beyinlerini bin akçeye inkârdan sulh ettiklerinde müvekkile-i mezbûre dahi sulh-ı mezbûru kabûl ve bedel-i sulh olan meblağ-ı mezbûr bin akçeyi merkūm Süleyman Çelebi yedinden bi’t-tamâm alıp kabz edip min ba‘d husûs-ı mezbûre müte‘allik de‘âvî ve husûmât ve eymândan mezkûr Süleyman Çelebi’nin zimmetini bi’l-külliye ibrâ-i âmm-ı kātı‘ü’n-nizâ‘ ile ibrâ ve ıskāt eyledim dedikde vekîl-i mezbûrun kelimât-ı meşrûhasını merkūm Süleyman Çelebi bi’l-muvâcehe tasdîk eylemeğin mâ hüve’l-vâki‘ bi’t-taleb ketb olundu. [Tahrîren] fî yevm 8 min Rebî‘ilevvel sene 1050.


Şuhûdü’l-hâl: Ahmed Ağa b. Abdülmennân, Ahmed Çelebi b. Muslu, Mustafa Subaşı [b.] Mehmed, Mehmed Halîfe b. İbrahim el-Müezzin, Ömer Çelebi b. Süleyman, Abdi b. Abdullah muhzır, Ahmed Efendi el-kadı, Hasan Efendi el-kadı, Mehmed Efendi mülâzım