.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 282
Hüküm no: 378
Orijinal metin no: [212-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Fâtıma bt. Yusuf’un Süleyman b. Ramazan’a mudârebeye verdiği meblağın 40.000 akçe değil 20.000 akçe olduğunun tespiti

Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkine Fâtıma bt. Yusuf nâm hâtun mahfil-i kazâda işbu râfi‘ü’l-kitâb Süleyman b. Ramazan nâm kimesne mahzarında takrîr-i da‘vâ edip bundan akdem Osmânî on iki akçeye râyic iken mezbûr Süleyman Çelebi’ye bi-tarîki’l-mudârebe kırk bin akçe verip yirmi bin akçesin alıp yirmi bin akçe hakkım zimmetinde bâkī kaldı suâl olunup takrîri tahrîr olunmak matlûbumdur dedikde, gıbbe’s-suâl mezbûr Süleyman cevâbında fi’l-hakīka merkūme Fâtıma yedinden Osmânî on iki akçeye râyic iken yirmi bin akçe alıp merkūmenin yedine teslîm eyledim, zimmetimde bir akçe hakkı kalmadı, merkūme Fâtıma’dan meblağ-ı mezbûr yirmi bin akçeden ziyâde akçe almadığını inkâr ile cevâb vericek müdde‘iye-i merkūmeden sıdk-ı makāline beyyine taleb olundukda ityân-ı beyyineden acz izhâr edip istihlâf olunsun dedikde [213] gıbbe’l-istihlâf, mezbûr Süleyman Çelebi merkūme Fâtıma Hâtun yedinden meblağ-ı mezbûr yirmi bin akçeden ziyâde almadığına yemîn billâhi’l-aliyyi’l-azîm etmeğin mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâmin min şehri Rebî‘ilevvel sene hamsîn ve elf.


Şuhûdü’l-hâl: Ahmed Efendi el-kadı, Hasan Efendi el-kadı, Mehmed Efendi [b.] Menteş, Mustafa Çorbacı [b.] Mehmed ve gayruhüm