.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 283
Hüküm no: 379
Orijinal metin no: [213-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ebûbekir Bey b. Mustafa’nın bahçesini kardeşi Hasan Çelebi’ye sattığı

Havâss-ı aliyye kazâsı muzâfâtından Hasköy mahallâtından Keçeciler mahallesinde sâkin Ebûbekir Bey b. Mustafa nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb karındaşı Hasan Çelebi nâm kimesne mahzarında bi’t-tav‘i’s-sâf ikrâr ve takrîr-i kelâm edip mahalle-i mezbûrede vâki‘ bir tarafı Pîr Veli b. ( ) mülkü ve bir tarafı Sefer Çelebi mülkü ve iki tarafı tarîk-i âm ile mahdûd ve mümtâz olan hadîkayı mezbûr Hasan Çelebi’ye nakd-i râyic fi’l-vakt bin akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm zikr olunan hadîka mezbûr Hasan Çelebi’nin mülk-i müşterâsıdır, keyfemâ yeşâ ve yehtâr mutasarrıf olsun dedikde, mukırr-ı merkūmun ikrâr-ı meşrûhunu el-mukarru lehü’l-mezbûr Hasan Çelebi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâdî aşer min şehri Rebî‘ilevvel sene hamsîn ve elf.


Şuhûdü’l-hâl: ( )