.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 283
Hüküm no: 380
Orijinal metin no: [213-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Sefer Çelebi b. Mustafa’nın mülk odasını Hasan Çelebi b. Mustafa’ya sattığı

Havâss-ı aliyye kazâsı kazâsına tâbi‘ Hasköy mahallâtından Keçeciler mahallesinde sâkin Sefer Çelebi [b.] Mustafa nâm kimesne meclis-i şer‘-i şerîf-i lâzımü’t-teşrîfde işbu râfi‘ü’l-kitâb Hasan Çelebi b. Mustafa nâm kimesne mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafı Pîr Veli mülkü ve iki tarafı bâyi‘-i mezbûr Hasan Çelebi mülkü ve bir tarafı Ahmed b. Minyâz mülkü ile mahdûd ve mümtâz olan bir bâb tahtânî odayı ve muhavvatayı ve bir bi’r-i mâ’ı ve eşcâr-ı müsmire ve gayr-ı müsmireyi müştemil olan mülk odamı mezbûr Hasan Çelebi’ye nakd-i râyic fi’l-vakt üç bin akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm zikr olunan [oda] mezbûr Hasan Çelebi’nin mülk-i müşterâsıdır keyfemâ yeşâ ve yehtâr mutasarrıf olsun dedikde mukırru’l-mezbûrun ikrâr-ı meşrûhunu el-mukarru lehü’l-mezbûr Hasan bi’l-muvâcehe ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâmis min şehri Rebî‘ilevvel [sene] hamsîn ve elf.


Şuhûdü’l-hâl: Mustafa Halîfe b. Surûrî el-İmâm, Mustafa Çelebi b. Mirza, Veli [b.] Hasan, Mahmud b. Hasan, Ahmed b. Abdullah serbölük, el-Hâc Mustafa [b.] Şaban, Hasan Bey b. Mustafa, Ömer Beşe b. Abdullah, Mustafa b. Yakub, Ramazan el-Müezzin