|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 284 Hüküm no: 381 Orijinal metin no: [213-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Arzhan v. Fedi’nin ölen babasının sağlığında satın aldığı ve miras olarak kendisine intikal eden ev ve bağlarda tasarrufuna mâni olunduğundan mülkiyet tespiti davası
Vilâyet-i Anadolu’da Eğin kazâsına tâbi‘ Sorak nâm karye sâkinlerinden Arzhan v. Fedi nâm Ermeni meclis-i şer‘-i şerîf-i lâzımü’t-teşrîfde Mesak v. Serkis nâm Ermeni muvâcehesinde üzerine takrîr-i da‘vâ edip bundan akdem hâlik olan babam Fedi nâm Ermeni târih-i kitâbdan on iki sene mukaddem yine kazâ-i mezbûra tâbi‘ Venk-i Hızır İlyas nâm karye sükkânından Harib v. Kortimur nâm Ermeni’den karye-i mezbûrede vâki‘ olup bir tarafı Mardik v. Yorgi bağı ve bir tarafı Mikayil v. ..? mülkü ve bir tarafı Hazal v. Papas mülkü ve bir tarafı tarîk-i âm ile mahdûd [214] bir bâb yer evini ve bahçeyi müştemil mülk menzilimi ve yine Sulubağ demekle ma‘rûf bir tarafı Papas v. Kemal bağı ve bir tarafı Bahâdır v. Omid bağı ve bir tarafı Mustafa Beşe b. Abdullah bağı ile mahdûd bir kıt‘a bağımı ve yine Susuzbağ demekle ma‘rûf bir tarafı Nasuh b. Abdullah bağı ve bir tarafı Yani v. Karaca bağı ve bir tarafı Arık v. Kirik bağı ve bir tarafı Remakire v. Laken bağı ile mahdûd bir kıt‘a bağını mürd olmazdan mukaddem safka-i vâhide ile iki yüz aded kâmil riyâlî guruşa iştirâ ve kabz edip meblağ-ı merkūmu mezbûr Harib’e teslîm eylemiş idi el-hâletü hâzihî eşyâ-i mezkûre dahi verâsetim hasebiyle bana intikāl eyledi, zabt etmek murâd eylediğimde mezbûr Mesak bi-gayr-ı vechin şer‘î tasarruf etmek murâd edip beni tasarrufdan men‘ eder suâl olunup kasr-ı yedine tenbîh olunmak matlûbumdur dedikde, gıbbe’s-suâl mezbûr Mesak cevâbında yine kazâ-i mezbûrda sâkin iken mürd olan Arzhan v. Serkis nâm Ermeni’nin mülk-i müşterâsı olup mürd oldukda sulbî sagīr oğlu Serkis’e ve sadriye sagīre kızı ( ) intikāl edip sagīrân-ı mezbûrânın kıbel-i şer‘den mansûb vasîsi olduğum ecilden vesâyeten tasarruf ederim deyû hâlik-i mezbûr Fedi’nin mülk-i müşterâsı olduğun inkâr edicek, müdde‘î-i mezbûrdan sıdk-ı makāline beyyine taleb olundukda udûl-i müslimînden Osman Beşe b. Abdullah er-Râcil ve Mustafa Çelebi b. Abdullah er-Râcil meclis-i şer‘a hâzırân olup gıbbe’l-istintâk mezbûrânlar cevâblarında fi’l-hakīka bizim huzûrumuzda mezbûr Fedi hâlik olmazdan mukaddem merkūm Harib’den eşyâ-i mezkûreyi iki yüz aded kâmil riyâlî guruşa iştirâ edip meblağ-ı merkūmu merkūm Harib’e teslîm eyledi, eşyâ-i mezkûre hâlik-i mezbûr Fedi’nin mülk-i müşterâsıdır, biz buna şâhidiz şehâdet dahi ederiz deyû edâ-i şehâdet-i şer‘iyye ettiklerinden sonra ba‘de’t-ta‘dîl ve’t-tezkiye şehâdetleri hayyiz-i kabûlde vâkı‘a olmağın mâ hüve[‘l-vâki‘] bi’t-taleb ketb olundu. Tahrîren fi’l-yevmi’s-sâmin min şehri Rebî‘ilevvel sene hamsîn ve elf.
Şuhûdü’l-hâl: Ahmed Ağa b. Abdullah, Mahmud Çelebi b. Mehmed, Ahmed Çelebi b. Muslu, Mehmed Beşe b. ( ) er-Râcil, Hasan Beşe er-Râcil, Asuzader v. Yehik, Asuzader v. Şahin, Gülbeği v. Papas, Argan v. Menhilas, Haydar v. Papas, Evik v. Mircan, Fedi v. Harib, Etvanes v. Harib, Arzhan v. ( ), Agnar v. Murad
|