|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 285 Hüküm no: 382 Orijinal metin no: [214-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Cemile bt. İlyas’ın arsasını Hasan Çelebi b. Mustafa’ya sattığı
Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkine Cemile bt. İlyas nâm hâtun meclis-i şer‘-i hatîr-i lâzımü’t-tevkīrde işbu râfi‘ü’l-kitâb oğlu Hasan Çelebi b. Mustafa nâm kimesne mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd olup tûlen yedi buçuk zirâ‘ ve arzan üç zirâ‘ arz-ı hâliyemi ve bir kenîfimi mezbûr Hasan Çelebi’ye nakd-i râyic fi’l-vakt iki bin akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm [215] zikr olunan arz-ı hâliye mezbûr Hasan Çelebi’nin mülk-i müşterâsıdır keyfemâ yeşâ ve yehtâr mutasarrıf olsun dedikde mukırra-i merkūmenin ikrâr-ı meşrûhasını el-mukarru lehü’l-mezbûr Hasan Çelebi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb [olundu]. Tahrîren fi’l-yevmi’l-hâmis? min şehri Rebî‘ilevvel sene hamsîn ve elf.
Şuhûdü’l-hâl: Mustafa Halîfe b. Surûrî el-İmâm, Mustafa Çelebi b. Mirza, Veli b. Hasan, Mahmud b. Hasan, Ahmed b. Abdullah serbölük, el-Hâc Mustafa [b.] Şaban, Hasan Bey [b.] Mustafa, Ömer Beşe b. Abdullah er-Râcil, Mahmud Bey [b.] Mirza el-Cündî, Mustafa [b.] Cafer, Ramazan el-Müezzin, Abdi Bey serbölük, Ali b. Abdullah
|