.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 285
Hüküm no: 383
Orijinal metin no: [215-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Denizde boğulan Musa b. Hızır’ın cesedinin dalgıçlar tarafından çıkarılarak keşfedildiği

İşbu bâ‘isetü’l-kitâb Müstedâme bt. Abdullah nâm hâtun meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm eyleyip zevcim Musa b. Hızır nâm kimesne Havâss-ı aliyye kazâsına tâbi‘ Hasköy mahallâtından Ahmed Çelebi mahallesi kurbunda vâki‘ kiremit fırını civârında târih-i kitâb günü vakt-i zuhrda deryâya girip gasl ederken garîk-i bahr olmuşdur, cânib-i şer‘den üzerine varılıp vâki‘ hâl mahallinde keşf ve tahrîr olunmak matlûbumdur dedikde, bu fakīr ve bi’l-fi‘il karye-i mezkûre subaşısı olan fahrü’l-akrân Mustafa Bey b. ( ) ve zeyl-i kitâbda mastûrü’l-esâmi olan müslimîn ile mahall-i mezbûra varılıp mezkûr Musa üzerinde olan esvâbı mahall-i mezkûre vaz‘ etmekle garîk-i bahr olduğu müşâhede olunup bahrdan ihrâc için dalgıç dalıp mezbûr Musa’yı ihrâc eyleyip a‘zâsına nazar olundukda eser-i cerâhat olmayıp garîkan vefât eylediği müte‘ayyin ve mütehakkik olmağın vâki‘ hâl mezbûre Müstedâme talebi ile mahallinde keşf ve tahrîr olundu. Tahrîren fi’l-yevmi’s-sâbi‘ aşer min şehri Rebî‘ilevvel li sene hamsîn ve elf.


Şuhûdü’l-hâl: Fahrü’l-akrân Mehmed Efendi b. Süleyman, İbrahim Bey b. Yusuf el-Cündî, el-Hâc Ahmed b. Bâli, Hüseyin b. Hasan, Ali Beşe b. Mehmed, Ahmed Bey b. Abdullah, Abdülmümin b. Mehmed, Ali b. Abdullah ve gayruhüm