.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 286
Hüküm no: 384
Orijinal metin no: [215-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Denizde boğulan Musa b. Hızır’ın üzerinden çıkan eşyalarının subaşı tarafından zevcesi Müstedâme bt. Abdülmennân’a teslim edildiği

Bundan akdem Hasköy kurbunda lebideryâda garîkan vefât eden Musa b. Hızır nâm kimesnenin zevce-i metrûkesi idiği hâkim-i muvakki‘u’l-kitâb huzûrunda sâbit ve zâhir olan Müstedâme [216] bt. Abdülmennân nâm hâtun mahfil-i kazâda bi’l-fi‘il karye-i mezkûre subaşısı olan Mustafa Bey b. Mehmed mahzarında takrîr-i kelâm ve ta‘bîr ani’l-merâm edip zevcim mezbûr Musa mukaddemâ mahall-i mezkûrda garîk-i bahr oldukda üzerinde mevcûd olan esvâbından bir müsta‘mel tülbenti ve bir köhne zıbını ve bir gömleği ve bir donu ve bir zer çakşırı ve bir demir sini ve bir çift papucu ve bir kuşağı ve bir gümüşlü bıçağı ve bir köhne sini ve bir esedî guruşunu ve iki yüz yirmi yedi hurda akçesini ahz eylemişidi, el-hâletü hâzihî eşyâ-i mezkûreyi mezbûr Mustafa Bey yedinden verâsetim hasebiyle ahz u kabz eyledim yedinde müteveffâ-yı mezbûrun bir şeyi kalmadı dedikde gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ aşer min şehri Rebî‘ilevvel sene hamsîn ve elf.


Şuhûdü’l-hâl: ( )