|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 287 Hüküm no: 385 Orijinal metin no: [216-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Zamâne bt. Abdullah’ın muhtelif eşyayı Osman b. Abdullah’ın yetimlerine hibe ettiği
Havâss-ı aliyye kazâsına tâbi‘ Hasköy mahallâtından Turşucu mahallesinde sâkine Zamâne bt. Abdullah nâm hâtun meclis-i şer‘-i hatîr-i lâzımü’t-tevkīrde yine mahalle-i mezbûrede sâkin iken bundan akdem fevt olan Osman b. Abdullah nâm kimesnenin sulbî sagīr oğulları Mustafa ve Mehmed ve Ahmed ve Ali nâm sagīrlerin vasîyy-i şer‘îsi olan Saliha bt. Abdullah nâm hâtun mahzarında bi’t-tav‘i’s-sâf ikrâr ve takrîr-i kelâm edip silk-i mülkünde münselik olan iki beledî döşek ve iki yemeni yorgan ve beş yemeni yastık ve iki kilim ve bir Selânik keçesi ve üç sahan ve iki tencere ve bir hamam leğeni ve bir demir sini ve üç sandık ve bir tepsi ve bir bakraç ve bir câmesi? ve bir alaca yük perdesi sagīrûn-ı mezbûrûna ale’s-seviyy hibe-i sahîha-i şer‘î ile hibe ve temlîk ve teslîm edip vasiyye-i mezbûre Saliha Hâtun dahi vech-i muharrer üzre meclis-i hibede eşyâ-i mezkûreyi kabûl ve ittihâb ve kabz ve tesellüm ve temellük eyledi, ba‘de’l-yevm eşyâ-i mezkûre sagīrûn-ı mezbûrûnun mülk-i mevhûblarıdır keyfemâ yeşâ’ûn ve yehtârûn mutasarrıfûn olsunlar dedikde, mukırra-i merkūmenin ikrâr-ı meşrûhasını vasiyye-i merkūme Saliha Hâtun bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. ( ) [Şuhûdü’l-hâl:] ( )
|