.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 288
Hüküm no: 387
Orijinal metin no: [217-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Saliha bt. Hüseyin’in ortak oldukları evdeki hissesini kız kardeşi Fâtıma’ya sattığı

Havâss-ı aliyye kazâsına tâbi‘ Hasköy mahallâtından Turşucu mahallesinde sâkine Saliha bt. Hüseyin nâm hâtun meclis-i şer‘-i hatîr-i lâzımü’t-tevkīrde işbu râfi‘atü’l-kitâb li ebeveyn kız karındaşı Fâtıma nâm hâtun muvâcehesinde bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafı Turşucu Vakfı ve bir tarafı Osman Reis mülkü ve bir tarafı ( ) Abdullah mülkü ve bir tarafı tarîk-i âm ile mahdûd ve mümtâz olup iki bâb tahtânî odayı ve bir kenîfi ve muhavvatayı ve eşcâr-ı müsmire ve gayr-ı müsmireyi müştemil olup ale’l-iştirâki’s-seviy tasarrufu[m]uzda olan menzilin nısf hisse-i şâyi‘amı mezbûre Fâtıma’ya nakd-i râyic fi’l-vakt bin yüz akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i nısf-ı mebî‘ eyledim, ba‘de’l-yevm zikr olunan menzilin nısf-ı şâyi‘i mezbûre Fâtıma’nın mülk-i müşterâsıdır, keyfe mâ teşâ ve tahtâ[r] mutasarrıfa olsun dedikde mukırra-i merkūmenin ikrâr-ı meşrûhasını el-mukarru leha’l-mezbûre bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâsıtı şehri Rebî‘ılâhir sene hamsîn ve elf.


Şuhûdü’l-hâl: İbrahim Efendi b. Hüsrev el-İmâm, Mehmed Halîfe b. Haydar el-Müezzin, Mehmed Beşe b. Bilal, Muslu b. Veli, Ali Beşe b. Abdullah, Nasuh b. Mehmed, Mehmed b. Mehmed el-Müezzin, Mustafa Beşe b. Mehmed, Abdi Beşe b. Mehmed, Hüseyin Beşe b. Mehmed er-Râcil, Mehmed Beşe b. Keyvan