|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 288 Hüküm no: 388 Orijinal metin no: [217-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
İbrahim Paşa’ya ait şamdanın emânet verildiği iddiasının ispat edilemediği
Hâlen Kastamonu paşası olan iftihârü’l-emâcid ve’l-ekârim câmi‘ü’l-mehâsin ve’l-mekârim olan İbrahim Paşa hazretlerinin taraf-ı [218] karînü’ş-şerîflerinden husûs-ı âti’l-beyânı da‘vâya vekîl olup nehc-i şer‘î üzre vekâleti sâbite olan Haydar Bey b. Hasan meclis-i şer‘-i hatîr-i lâzımü’t-tevkīrde Arzhan v. Aslan nâm zimmîyi ihzâr ve mahzarında üzerine takrîr-i da‘vâ edip Paşa-yı mûmâ-ileyh hazretlerinin abd-i memlûkü olup Rıdvan b. Abdullah nâm gulâm mûmâ-ileyhin bir gümüş şamdanını ahz edip mezbûr Arzhan’a emânet vaz‘ eylemişdir, vermede te‘allül eder suâl olunup takrîri tahrîr olunmak matlûbumdur dedikde, gıbbe’s-suâl ve akībe’l-inkâr vekîl-i merkūmdan takrîr-i da‘vâsını mübeyyin beyyine taleb olundukda ityân-ı beyyineden izhâr-ı acz edip istihlâf olunsun dedikde merkūm Arzhan mârrü’z-zikr şamdanı merkūm Rıdvan yedinden almadığına yemîn billâhillezî enzele’l-İncîle alâ İsa (a.s.) etmeğin mâ vaka‘a bi’t-taleb ketb olundu. Tahrîren fî evâsıtı şehri Rebî‘ılâhir sene hamsîn ve elf.
Şuhûdü’l-hâl: Mahmud Bey b. Mirza el-Cündî, Mustafa Çelebi b. Halil serrâc-ı hâssa, Ali b. Abdullah, Ali b. Mehmed, Sefer b. Abdullah, Mehmed Bey
|