.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 289
Hüküm no: 389
Orijinal metin no: [218-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mihal v. Yani’nin kiracısı olduğu vakıf fırının yanında ahır olarak kullandığı arsaya mütevellînin müdahalesinin men edilmesi

Havâss-ı aliyye kazâsına tâbi‘ Hasköy’de sâkin Mihal v. Yani nâm zimmî mahfil-i kazâda merhûm ve mağfûrun-leh Kapudân Sinan Paşa’nın kasaba-i Beşiktaş’ta vâki‘ olan câmi‘-i şerîfinin evkāfına bi’l-fi‘il mütevellî olan Rıdvan Bey b. Abdullah nâm kimesne muvâcehesinde üzerine takrîr-i da‘vâ edip karye-i mezbûrede vâki‘ üç tarafı vakf-ı mezbûrdan Yako nâm Yahudi tasarrufunda olan arsa ve bir tarafı dahi yine vakf-ı mezbûrdan olup icâre-i mu‘accele ve müeccele ile kendi tasarrufumda olan bir bâb ekmekçi fırınına muttasıl olup tûlen dokuz buçuk zirâ‘ ve arzan dört buçuk zirâ‘ arsayı kadîmü’l-eyyâmdan mezkûr fırının ahırı olmağla ma‘an tasarruf eder idim, hâlen mütevellî-i mezbûr Rıdvan Bey üslûb-ı sâbık üzre fırın-ı mezbûr ile arsa-i mezkûreye ma‘an tasarrufuma mâni‘ olur, suâl olunup takrîri tahrîr olunmak matlûbumdur dedikde, gıbbe’s-suâl ve akībe’l-inkâr müdde‘î-i mezbûrdan sıdk-ı makālini mübeyyin beyyine taleb olundukda udûl-i müslimînden olup karye-i mezbûre sükkânından Mehmed b. Veli ve Hasan b. ( ) nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd mezbûrlar cevâblarında fi’l-hakīka hudûd-ı mezkûr ile mahdûd olan arsa mezbûr Mihal’in icâre-i mu‘accele ve icâre-i müeccele ile tasarrufunda olan ekmekçi fırınının ahırıdır, mezbûr Mihal fırın-ı mezkûr ile arsa-i merkūmeyi ma‘an tasarruf edegelmişdir deyû edâ-i şehâdet-i şer‘iyye eylediklerinde, ba‘de ri‘âyet-i şerâ’iti’l-kabûl şehâdetleri hayyiz-i kabûlde vâkı‘a olmağın mâ vaka‘a bi’t-taleb ketb olundu. Tahrîren fî evâsıtı şehri Rebî‘ılâhir li sene hamsîn ve elf.


Şuhûdü’l-hâl: ( )