|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 289 Hüküm no: 390 Orijinal metin no: [219-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mutasarrıfı öldüğü için vakfa intikal eden vakıf oda ile mahzenin Ezmerağda’ya icâreteynle kiralandığı
Havâss-ı aliyye kazâsı muzâfâtından Hasköy mahallâtından el-Hâc Şaban Vakfı’na bi’l-fi‘il mütevellî olan Ahmed Efendi b. Abdi el-İmâm meclis-i şer‘-i hatîr-i lâzımü’t-tevkīrde işbu râfi‘atü’l-kitâb Ezmerağda v. Nikola nâm Nasrâniyye muvâcehe[sinde] bi’t-tav‘i’s-sâf ikrâr ve takrîr-i kelâm eyleyip vakf-ı mezbûrdan olup karye-i mezkûrede vâki‘ bir tarafı mezbûre Ezmerağda’nın tasarrufunda olan vakıf oda ve iki tarafı tarîk-i âm ve bir tarafı Zaharya v. İstefano nâm zimmî mülkü ile mahdûd ve mümtâz olan bir bâb tahtânî mahzen ve bir bâb fevkānî odayı icâre-i mu‘accele ve müeccele ile mutasarrıfa olan Zenpula bt. Nikola nâm Nasrâniyye mürd olup zikr olunan bir bâb mahzen ve bir bâb fevkānî oda vakfa intikāl edip icâre-i mu‘accele ile îcâr olunmak vakfa enfa‘ olmağın mezbûre Ezmerağda’ya otuz bin nakd-i râyic fi’l-vakt akçe icâre-i mu‘accele ve beher şehr altmışar akçe icâre-i müeccele ile tevliyetim hasebiyle îcâr edip mezbûre Ezmerağda dahi istîcâr ve kabûl [ve] zikr olunan otuz bin akçe icâre-i mu‘acceleyi vakıf için ahz u kabz eyledim, ba‘de’l-yevm zikr olunan bir bâb mahzen ve bir bâb fevkānî oda Ezmerağda’nın müfevvazıdır dedikde, mütevellî-i merkūmun ikrâr-ı meşrûhunu el-mukarru leha’l-mezbûre Ezmerağda bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri şehri Rebî‘ılâhir sene hamsîn ve elf.
Şuhûdü’l-hâl: Mehmed b. Abdülkerim, Mustafa b. Abdullah, Mehmed Efendi [b.] Menteş, Habîb Efendi [b.] İslâm, Mustafa Çelebi b. Halil serrâc, Mustafa b. Abdi, Rıdvan Bey [b.] Abdullah mütevellî, Ali Çelebi b. Ahmed
|