|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 290 Hüküm no: 391 Orijinal metin no: [219-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ahmed Efendi b. Abdi’nin evini Himmet b. Pürkadem’e sattığı
Havâss-ı aliyye kazâsına tâbi‘ el-Hâc Şaban mahallesinde sâkin Ahmed Efendi b. Abdi nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Himmet b. Pürkadem nâm kimesne mahzarında bi’t-tav‘i’s-sâf ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafı ba‘zan Mâhi Hâtun ve ba‘zan Kalef nâm Yahudi mülkü ve bir tarafı Rahime Hâtun ve ba‘zan Sarı Mehmed ve ba‘zan Musa b. Ömer mülkleri ve bir tarafı tarîk-i hâs ve bir tarafı tarîk-i âm ile mahdûd ve mümtâz olan üç bâb fevkānî ve üç bâb tahtânî odayı ve bir kenîfi ve iki bi’r-i mâ’ı ve eşcâr-ı müsmire ve gayr-ı müsmireyi ve muhavvatayı müştemil olan mülk menzilimi mezbûr Himmet’e nakd-i râyic fi’l-vakt yirmi dört bin akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim, ba‘de’l-yevm zikr olunan menzil mezbûr Himmet’in mülk-i müşterâsıdır keyfemâ yeşâ ve yehtâr mutasarrıf olsun dedikde, mukırr-ı merkūmun ikrâr-ı meşrûhunu el-mukarru lehü’l-mezbûr Himmet bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâsıtı Rebî‘ılâhir li sene hamsîn ve elf.
Şuhûdü’l-hâl: Mahmud Çelebi b. Mehmed es-Serrâc, Mustafa Çelebi b. Halil es-Serrâc, Abdi Bey b. Şaban es-Serrâc, Osman Bey b. Mustafa es-Serrâc, Ali Dede b. Hüseyin, Hızır b. Durak, Ali b. Abdullah, Mustafa b. Nurullah, Musa b. Ömer, Abdülbâkī b. Abdi ve gayruhüm mine’l-hâzırîn
|