|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 292 Hüküm no: 394 Orijinal metin no: [220-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed b. Maksud’un mülk evini Hacı Şaban Vakfı’na bey‘ bi’l-istiğlâl yoluyla sattığı
Havâss-ı aliyye kazâsına tâbi‘ Hasköy mahallâtından el-Hâc Şaban mahallesinde sâkin Mehmed b. Maksud nâm kimesne meclis-i şer‘-i hatîr-i lâzımü’t-tevkīrde el-Hâc Şaban Vakfı’na bi’l-fi‘il mütevellî olan Ahmed Efendi b. Abdi nâm enâm mahzarında bi’t-tav‘i’s-sâf ikrâr ve i‘tirâf edip silk-i mülkümde münselik olup mahalle-i mezbûrede vâki‘ bir tarafı Hasan Dede b. Mehmed mülkü ve bir tarafı ba‘zan Ahmed Efendi ve ba‘zan Ali mülkü ve iki tarafı tarîk-i âm ile mahdûd ve mümtâz olan bir bâb fevkānî ve bir bâb tahtânî oda ve bir kenîfi [ve] muhavvatayı müştemil olan mülk menzilimi mütevellî-i merkūm Ahmed Efendi’ye beş bin akçeye bey‘ edip ol dahi mâl-ı vakıf ile [221] bi-tarîki’l-istiğlâl iştirâ edip kabz-ı semen ve teslîm-i mebî‘ eylediğimden sonra menzil-i mezbûru ba‘de’t-tahliyeti’ş-şer‘iyye yine târih-i kitâbdan sene-i kâmile gāyetine varınca mütevellî-i mezbûrdan altı yüz yirmi beş akçeye istîcâr eyledim, ol dahi vech-i meşrûh üzre îcâr ve tesellüm eyledi dedikde, gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Tahrîren fî evâhiri şehri Rebî‘ılâhir sene hamsîn ve elf.
Şuhûdü’l-hâl: Ahmed Efendi b. Abdi el-İmâm, Abdülbâkī Çelebi b. Ahmed, Ali Dede b. Hüseyin, Mehmed b. Abdülkerim, Hasan Dede b. Mehmed, Memi Beşe b. Hızır, Mehmed Çelebi b. Ali, Ali b. Abdullah, Halil b. Muslihiddin ve gayruhüm mine’l-hâzırîn
|