|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 292 Hüküm no: 395 Orijinal metin no: [221-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Bostancı Mehmed Bey b. Ahmed’in talebiyle, su yolunun altından açılan lağım yolunun zararının olmadığının tespiti
Husûs-ı âti’l-beyânı mahallinde tahrîr ettirmek için iftihârü’l-emâcid ve’l-ekârim câmi‘ü’l-mehâsin ve’l-mekârim hâlen Bostancıbaşı olan Mehmed Ağa -dâme izzuhû- taraf-ı karînü’ş-şereflerinden ta‘yîn olunan Mehmed Bey b. Ahmed nâm hâssa Bostancı meclis-i şer‘-i hatîr-i lâzımü’t-tevkīre gelip takrîr-i kelâm ve ta‘bîr ani’l-merâm edip Havâss-ı aliyye kazâsına tâbi‘ Hasköy’de sâkin olup Ermeni tâ’ifesinden Gülbeği v. Bayik nâm Ermeni karye-i mezbûre kurbunda vâki‘ Hadîka-i sultâniye’ye cârî olan suyolunun altından kârîz ihdâs eylemişdir, cânib-i şer‘-i şerîfden üzerine varılıp vâki‘ hâl keşf ve tahrîr olunup men‘ olunmak matlûbumdur dedikde, cânib-i şer‘-i mutahhardan bizzat ve hâlen suyolu nâzırı olan Hasan Ağa tarafından suyolcular kethüdâsı olan Mehmed Bey b. Mustafa ve suyolculardan üstâd Veli Bey b. Ramazan ve zeyl-i kitâbda mastûrü’l-esâmi olan bî-garaz müslümânlar ile zikr olunan mahalle varılıp nazar olundukda fi’l-hakīka zikr olunan suyolunun altından kârîz ihdâs olunup lâkin zikr olunan suyoluna aslâ zararı yokdur ve Mahmiye-i İstanbul’da vâki‘ olan suyollarının dahi altından kârîz ihdâs olunagelmişdir deyû mezbûrân suyolcular ve sâirleri icmâ‘ ve ittifâk eylediklerinden sonra zikr olunan suyolunun altından kârîz ihdâs etmenin zararı olmadığı mütehakkik olmağın mâ hüve’l-vâki‘ bi’t-taleb ketb olundu. Tahrîren fi’t-târihi’l-mezbûr.
Şuhûdü’l-hâl: Mahmud Çelebi b. Mehmed serrâc, Mehmed Efendi [b.] Menteş, Mustafa Çelebi [b.] Halil serrâc, Ali b. Abdullah ve gayruhüm
|