.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 293
Hüküm no: 396
Orijinal metin no: [221-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ölen iki ortak kiremitçinin vârislerinin hesaplaşıp birbirlerinin zimmetlerini ibrâ ettikleri

Vilâyet-i Anadolu’da vâki‘ Eğin kazâsına tâbi‘ Sorak nâm karyede sâkin iken mürd olan Arzhan v. Serkis nâm mürdün li ebeveyn karındaşı Mesak nâm Ermeni mahfil-i kazâda yine karye-i mezkûrede sâkin iken bundan akdem mürd olan Fedi’nin sulbî kebîr oğlu Arzhan nâm Ermeni mahzarında bi’t-tav‘i’s-sâf ikrâr ve takrîr-i kelâm edip bundan akdem hâlik olan karındaşım mezbûr Arzhan mürd-i merkūm Fedi ile kiremitçilik san‘atında şerîk olup ba‘de küll-i hesâb biribirlerinin zimmetinde bir akçe ve habbe hakları kalmamışdır, verâsetim hasebiyle mezbûr Arzhan’ın zimmetini ibrâ-i âm ile ibrâ ve ıskāt-ı tâm ile ıskāt eyledim, ba‘de’l-yevm husûs-ı mezbûra müte‘allik da‘vâ ve nizâ‘ sudûr ve zuhûr [222] ederse lede’l-hükkâmi’l-kirâm mesmû‘a ve makbûle olmaya dedikde, mukırr-ı merkūmun ikrâr-ı meşrûhunu el-mukarru lehü’l-mezbûr bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Tahrîren fi’t-târihi’l-mezbû[r] sene hamsîn ve elf.


Şuhûdü’l-hâl: Osman Beşe b. Abdullah er-Râcil, Mustafa Beşe b. Abdullah er-Râcil, Mehmed Beşe b. Abdullah, Hasan Beşe [b.] Abdullah, Mahmud Bey b. Alagöz, Osman Çelebi b. Ömer, Civan v. Fedi, Gülbeği [v.] Bayik, Bayındır v. Gülbeği, Murad v. Ağnad?, Azad v. Polat, Arzhan v. Bahâdır