|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 293 Hüküm no: 397 Orijinal metin no: [222-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
İsmihânî Hâtun’un ölen babasına ait arsa hususundaki davasında sulh olduğu
Mahmiye-i İstanbul’da Balat Câmi‘i kurbunda el-Hâc İlyas mahallesinde sâkine olup vakf-ı âti’l-beyâna kıbel-i şer‘den mütevellî nasb olunan İsmihânî bt. Mustafa nâm hâtun mahfil-i kazâda zikr-i âtî menzile mülkü olmak üzre vâzı‘u’l-yed idiği şer‘an zâhir ve müte‘ayyin olan Mihal v. Yani nâm zimmî mahzarında üzerine takrîr-i da‘vâ edip Havâss-ı aliyye kazâsı muzâfâtından karye-i Hasköy’de vâki‘ bir tarafı Timurhan Çavuş Vakfı ve bir tarafı ( ) nâm Yahudi mülkü ve iki tarafı tarîk-i âm ile mahdûd menzil arsası babam müteveffâ-yı mezbûr Mustafa’nın mülkü olup mülkünde olduğu hâlde hâl-i hayâ[t] ve kemâl-i sıhhatinde vakfedip gallesini evlâdına, evlâd-ı evlâdına ile’l-inkırâz şart ve ta‘yîn eyleyip ben vâkıf-ı mezbûrun bint-i sulbiyesi olmağın arsa-i mezkûrenin hakk-ı tasarrufu bana intikāl etmişdir deyû takrîr-i şürûhuna muvâfık mümzât ve mahtûme bir vakfiye ibrâz edip gıbbe’s-suâl mezbûr Mihal müdde‘iye-i mezbûre İsmihân mezbûr Mustafa’nın bint-i sulbiyesi idiğin i‘tirâfdan sonra takrîr-i makāl edip arsa-i mezkûre mezbûr Mustafa’nın mülkü olup mezbûr Mustafa vefât eyledikde mezbûre İsmihân sagīre olmağla vâlidesi Âişe nâm hâtun zarûret-i nafakası için semen-i misli ile arsa-i mezbûreyi Zito nâm zimmîye semen-i ma‘lûme bey‘ eyleyip ol dahi iştirâ eyledikden sonra üzerine kendi mâlıyla ebniye vaz‘ ve ihdâs eyleyip mülkiyet üzre tasarruf eyledikden sonra mezbûr Zito mürd olmağın menzil-i merkūm li ebeveyn kız karındaşı Yerako nâm zimmîyyeye intikāl edip ol dahi mülkiyet üzre tasarruf eyledikden sonra merkūme Yerako menzil-i merkūmu bana semen-i ma‘lûme bey‘ eyleyip ben dahi iştirâ eyleyip nice müddet tasarruf eyledim, ilâ hâze’l-ân mülkiyet üzre tasarruf ederim, vakfiyyeti ma‘lûmum değildir deyû inkâr etmeğin mezbûre İsmihânî’den da‘vâ-yı mezkûresini mübeyyine beyyine taleb olundukda ikāmet-i beyyineden âcize olup ve mezbûr Mihal vakfiyyetini kemâl-i ısrâr ile inkârda olup nice müddet hükkâm-ı mâziyyeye murâfa‘a ve muhâsama olup beyinlerinde da‘vâ ve cedel mütemâdî olmağın bu makūlede müdde‘iye bir mikdâr nesne verilip sulh olmak câ’iz idiği kütüb-i fıkhiyyeden Bahrü Râik’in Kitâb-ı Sulh’unda ve Muhît-i [223] Burhânî ve Zahîre-i Burhâniye’de mastûr olmağın ehl-i ahyâr ve sikāt-ı ebrârdan ba‘zı müslimîn tavassutuyla mezbûre İsmihânî da‘vâ-yı mezkûresinden mezbûr Mihal ile altı bin akçe üzerine inşâ’-i akd-i sulh eyledikde, mezbûr Mihal dahi sulh-ı mezkûru kabûl eylediğinden sonra mezbûre İsmihânî bedel-i sulh olan altı bin akçeyi mezbûr Mihal yedinden ahz u kabz edip da‘vâ-yı mezkûremden bi’l-külliye fâriğa oldum dedikde, gıbbe’t-tasdîki’l-mu‘teber menzil-i mezbûr mezkûr Mihal yedine mülkiyet üzre ibkā ve meblağ-ı mezbûru mütevellî-i mezbûr i‘mâl ve gallesini şart-ı vâkıf mûcebince mesârifine sarf etmek üzre tenbîh olunup vâki‘u’l-hâl bi’t-taleb ketb olundu. Tahrîren fi’l-yevmi’ ( ) aşer min şehri Rebî‘ılâhire li sene hamsîn ve elf.
Şuhûdü’l-hâl: Fahrü’l-müderrisîni’l-kirâm Mehmed Efendi b. el-merhûm Ali Efendi, Hüsameddin Efendi b. Cemâleddin, Mahmud Çelebi b. Mehmed es-Serrâc, Ahmed Çelebi b. Muslu, Ahmed b. Abdullah er-Râcil, Mehmed Halîfe b. İbrahim el-Müezzin, Mahmud Bey b. Mirza el-Cündî, Yusuf Bey b. Abdullah, İbrahim Çelebi b. Behram, Halil b. Muslihiddin, Ali Dede b. Hüseyin, Ali b. Abdullah ve gayruhüm mine’l-hâzırîn
|