|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 295 Hüküm no: 399 Orijinal metin no: [223-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Akive v. Elyezer’in komşusu Yako v. Yako’nun arsasından denize kadar olan kısmını lağım akıtmak için satın aldığının tespiti ve engel olunmaması
Havâss-ı aliyye kazâsına tâbi‘ Hasköy mahallâtından Pîrî Paşa mahallesinde sâkin Akive v. Elyezer nâm [Yahudi] meclis-i şer‘-i hatîr-i lâzımü’t-tevkīrde Yako v. Yako nâm Yahudi muvâcehesinde üzerine [224] takrîr-i da‘vâ eyleyip mezbûr Yako’nun sâkin olduğu menzil benim sâkin olduğum menzile muttasıl olup tûlen on altı zirâ‘ ve arzan buçuk zirâ‘ arsa ki benim tasarrufumda olan arsa cânibidir, deryâya varınca kârîz icrâsı için mezbûr Yako târih-i kitâbdan bir sene mukaddem bana on riyâlî guruşa bey‘ eyleyip kabz-ı semen-i ma‘dûd ve teslîm-i mebî‘-i mahdûd eyledikden sonra şimdi zikr olunan icrâya mâni‘ olur, suâl olunup takrîri tahrîr olunmak matlûbumdur dedikde, gıbbe’s-suâl ve akībe’l-inkâr mezbûr Akive’den sıdk-ı makālini mübeyyin beyyine taleb olundukda Mayor cemâ‘atinden Mosi v. Leviz ve Budin cemâ‘atinden Yasef v. Pentak nâm Yahudiler meclis-i şer‘a li ecli’ş-şehâde hâzırân olup gıbbe’l-istişhâd fi’l-hakīka merkūm Yako târih-i kitâbdan bir sene mukaddem zikr olunan mahalde tûlen on altı zirâ‘ ve arzan buçuk zirâ‘ arsa ki merkūm Akive’nin tasarrufunda olan arsa cânibidir, deryâya varınca kârîz icrâsı için merkūm Yako mezbûr Akive’ye bizim huzûrumuzda on riyâlî guruşa bey‘ eyledi, biz bu husûsa şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyet-i şerâ’iti’l-kabûl şehâdetleri hayyiz-i kabûlde vâkı‘a olmağın mâ vaka‘a bi’t-taleb ketb olundu. Tahrîren fî evâili şehri Cumâdelûlâ li sene hamsîn ve elf.
Şuhûdü’l-hâl: Mehmed Beşe b. Hızır, Ali b. Abdullah, Halil b. Muslihiddin ve gayruhüm mine’l-hâzırîn
|