.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 296
Hüküm no: 400
Orijinal metin no: [224-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Vefat eden Hüseyin Beşe’nin hanımları Kamer ve Âişe’nin mehir ve miras hisselerini aldıkları

Havâss-ı aliyye kazâsına tâbi‘ Hasköy mahallâtından Turşucu mahallesinde sâkin iken vefât eden Hüseyin Beşe b. Mehmed’in verâseti zevciyyetân-ı metrûkesi Kamer bt. Abdullah ve Âişe bt. Abdullah ve li ebeveyn kız karındaşı Emine nâm hâtunlara münhasıra olduğu şer‘an mütehakkik oldukdan sonra mezbûretân Kamer ve Âişe meclis-i şer‘-i hatîr-i lâzımü’t-tevkīrde müteveffâ-yı mezbûrun muhallefâtına vâzı‘atü’l-yed olan işbu bâ‘isetü’l-kitâb mezbûre Emine mahzarında bi’t-tav‘i’s-sâf ikrâr ve takrîr-i kelâm eyleyip müteveffâ-yı mezbûrun muhallefâtından mahalle-i mezbûrede vâki‘ bir tarafı Dudu bt. İlyas nâm hâtun mülkü ve bir tarafı Saliha bt. Abdullah mülkü ve bir tarafı Yusuf b. Abdullah mülkü ve bir tarafı tarîk-i âm ile mahdûd ve mümtâz olan bir bâb beyt-i süflîyi ve hadîkayı müştemil olan beytin ve sâir muhallefâtının dört sehimden bir sehmi bize âid olmağla irs-i şer‘î ile intikāl eden hakkımızı ve bin akçe mehr-i müeccelimizi mezbûre Emine yedinden bi’t-tamâm ahz u kabz eyledik, ba‘de’l-yevm zikr olunan menzilde ve sâir muhallefâtda alâka ve medhalimiz kalmadı dediklerinde mukırratân-ı mezbûretânın ikrâr-ı meşrûhlarını el-mukarru leha’l-mezbûre Emine bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb [225] ketb olundu. Tahrîren fî evâhiri şehri Cumâdelûlâ li sene hamsîn ve elf.


Şuhûdü’l-hâl: İbrahim Çelebi b. Hüsrev el-İmâm, Mehmed Halîfe b. Haydar el-Müezzin, Ebûbekir Çelebi b. Mehmed, Şerife bt. es-Seyyid Mehmed, Ali b. Abdullah