.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 296
Hüküm no: 401
Orijinal metin no: [225-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Emine bt. Mehmed’in mülk evini Turşucuzâde Hüseyin Çelebi Vakfı’na bey‘ bi’l-istiğlâl yoluyla sattığı

Havâss-ı aliyye kazâsına tâbi‘ Hasköy mahallâtından Turşucu mahallesinde sâkine Emine bt. Mehmed nâm hâtun meclis-i şer‘-i hatîr-i lâzımü’t-tevkīrde merhûm Turşucuzâde Hüseyin Çelebi Vakfı’na bi’l-fi‘il mütevellî olan fahrü’l-e’imme İbrahim Efendi b. Surûrî mahzarında bi’t-tav‘i’s-sâf ikrâr ve takrîr-i kelâm eyleyip silk-i mülkümde münselik olup mahalle-i mezbûrede vâki‘ bir tarafı Dudu bt. İlyas mülkü ve bir tarafı Saliha bt. Abdullah mülkü ve bir [tarafı] Yusuf b. Abdullah mülkü ve bir tarafı tarîk-i âm ile mahdûd ve mümtâz olan bir bâb beyt-i süflîyi ve hadîkayı müştemil olan mülk menzilimi mütevellî-i merkūm İbrahim Efendi’ye üç bin akçeye bey‘ edip ol dahi mâl-ı vakıf ile bi-tarîki’l-istiğlâl iştirâ edip kabz-ı semen ve teslîm-i mebî‘ eylediğimden sonra menzil-i mezbûru ba‘de’t-tahliyeti’ş-şer‘iyye yine târih-i kitâbdan üç sene-i kâmile tamâmına varınca mütevellî-i mezbûrdan dokuz yüz akçeye istîcâr eyledim ol dahi vech-i meşrûh üzre îcâr ve teslîm eyledi dedikde gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâmis ve’l-ışrîn min şehri Cumâdelûlâ li sene hamsîn ve elf.


Şuhûdü’l-hâl: ( )