|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 297 Hüküm no: 402 Orijinal metin no: [225-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Beşe b. Abdullah’ın İstefan’a verdiği ödüncü kefili Bayındır’dan tahsil ettiği
Bâ‘isü’l-kitâb Mehmed Beşe b. Abdullah nâm kimesne meclis-i şer‘-i şerîf-i lâzımü’t-teşrîfde Bayındır v. Gülbeği nâm Ermeni muvâcehesinde bi’t-tav‘i’s-sâf ikrâr ve takrîr-i kelâm eyleyip gāib ani’l-meclis olan İstefan nâm zimmîde cihet-i karz-ı şer‘îden iki bin iki yüz akçe hakkım olup meblağ-ı mezbûr iki bin iki yüz akçeye mezbûr Bayındır tarafından emr-i kabûlü hâviye kefâletle kefîl olmuşdu, el-hâletü hâzihî zikr olunan meblağ-ı mezbûr iki bin iki yüz akçeyi kefîl-i merkūm Bayındır yedinden kefâleti hasebiyle bi’t-tamâm ahz u kabz eyledim dedikde mukırr-ı merkūmun ikrâr-ı meşrûhunu kefîl-i merkūm Bayındır bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri şehri Cumâdelûlâ li sene hamsîn ve elf.
Şuhûdü’l-hâl: ( )
|