|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 297 Hüküm no: 403 Orijinal metin no: [226-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed b. Bilal’in tasarrufunda olan Pîrî Mehmed Paşa Vakfı’na ait dükkân harap olup kirasına mahsûben yeniden inşâ ettiği ve yapılan harcamanın keşfi
Havâss-ı aliyye kazâsına tâbi‘ Hasköy mahallâtından Pîrî Paşa İskelesi kurbunda vâki‘ olup merhûm ve mağfûrun-leh Pîrî Mehmed Paşa Evkāfı’ndan iki tarafı vakf-ı mezbûr ve bir tarafı deryâ ve bir tarafı tarîk-i âm ile mahdûd ve mümtâz olan iki bâb tahtânî debbağ dükkânının icâre-i mu‘acce[le-i] ma‘lûme ile altmış akçe ücret-i müeccele ile mutasarrıfı olan işbu sâhibü’l-kitâb Mehmed b. Bilal nâm kimesne meclis-i şer‘-i Ahmediyye’ye gelip takrîr-i kelâm edip merhûm [ve] mağfûrun-leh Pîr Mehmed Bey Evkāfı’ndan olup fülân ve fülân ve (fülân?) ve fülân ile mahdûd olan iki bâb tahtânî (...) ...? mu‘accele-i ma‘l(ûme?) ...? …? …? vech-i mübeyyen üzre taht-ı tasarrufumda olan iki bâb dükkân ve (…) mürûr-ı eyyâm ve kürûr-ı şuhûr-i a‘vâm ile bi’l-külliye harâba müşrif olup aslâ kābil-i süknâ olmayıp ve vakf-ı mezbûrda dahi imâret [ve] meremmete müsâ‘ade olmadığı cihetden vakf-ı mezbûra hâlen meşrûtiyyet üzre mütevellî olan Zuhûr Efendi’den bundan akdem ben kendi mâlım ile icâre-i mu‘acceleme mahsûb olmak üzre bir mikdâr akçe harc-ı sarf edip müceddeden ba‘zı ebniye ihdâs etmeğe me’zûn olmağla hâlen vech-i muharrer üzre müceddeden iki tabaka debbağ dükkânı ihdâs edip hâlen ihdâs eylediğim binâ ne mikdâr akçe harc-ı sarf eylemek ile olduğun takvîm ve tahmîn ettirmek murâd ederim, savb-ı şer‘-i kavîmden âdem taleb ederim dedikde, kıbel-i şer‘-i mutahhardan bizzat ve hâssa mi‘mârlardan üstâd Ahmed Bey b. Abdullah ve ebniye ve sukūf ahvâline kemâl-i vukūfları olup zeyl-i kitâbda mastûrü’l-esâmi olan bî-garaz müslimîn ile dükkân-ı mezbûra varılıp akd-i meclis-i şerî‘at-ı Mustafaviyye eyledikde mütevellî-i vakf-ı mezbûrun vekîl-i şer‘îsi olup vakf-ı mezbûrun câbisi olan Ömer Halîfe b. Hüseyin huzûrunda mi‘mâr-ı mezbûr dükkân-ı merkūmun cümle binâsını mesâha eyledikde tabaka-i ûlâsında bir matbah ocağı iki bin ve on bir İznikmid direk kürsü? taşıyla bile? olup her biri yüz ellişer akçeden bin altı yüz elli akçe ve altı haftalama direk her biri on iki zirâ‘ olup biner akçeden altı bin akçe ve iki taban her biri onar zirâ‘ olup üçer yüz akçeden altı yüz akçe ve döşeme süllemi tahtası bennâ zirâ‘ıyla tûlen on zirâ‘ ve arzan on zirâ‘ bi-hesâb-ı şatrancî yüz zirâ‘ olup her bir zirâ‘ı altmışar akçeden altı bin akçe tahta perde bennâ zirâ‘ıyla tûlen yirmi zirâ‘ ve arzan üç zirâ‘ bi-hesâb-ı mezbûr altmış zirâ‘ olup her bir zirâ‘ı otuzar akçeden bin sekiz yüz akçe ve tahta nerdübân bennâ zirâ‘ıyla tûlen elli dört zirâ‘ ve kaddi üç zirâ‘ bi-hesâb-ı mezbûr yüz altmış iki zirâ‘ olup her bir zirâ‘ı yirmi beşer akçeden dört bin elli akçe ve bir sokak kapısı iki yüz akçe ve bir kenîf beş yüz akçe ve bir nerdübân dört yüz akçe ve tabaka-i sâniyede üç bâb odanın tahta perdesi bennâ zirâ‘ıyla tûlen otuz altı zirâ‘ ve arzan dört zirâ‘ bi-hesâb-ı mezbûr yüz kırk dört zirâ‘ olup her bir zirâ‘ı yirmi beşer akçeden üç bin altı yüz akçe ve döşeme tahta bennâ zirâ‘ıyla yirmi yedi zirâ‘ ve arzan on zirâ‘ bi-hesâb-ı mezbûr iki yüz yetmiş zirâ‘ olup her bir zirâ‘ı kırkar akçeden on bin sekiz yüz akçe ve tahta perde bennâ zirâ‘ıyla tûlen elli dört zirâ‘ ve kaddi beş zirâ‘ olup bi-hesâb-ı mezbûr yetmiş zirâ‘ olup her bir zirâ‘ı yirmi beşer akçeden altı bin yedi yüz elli akçe ve altı yama direk otuzar akçeden yüz seksen akçe ve bir ocak beş yüz akçe ve sakfı bennâ zirâ‘ıyla tûlen otuz üç zirâ‘ ve arzan on zirâ‘ [227] bi-hesâb-ı mezbûr üç yüz otuz zirâ‘ olup her bir zirâ‘ı kırkar akçeden on üç [bin] iki yüz akçe cem‘an elli yedi bin yedi yüz elli akçeye takvîm ve tahmîn ve bu mahalde bu makūle dükkânın binâsı meblağ-ı merkūmdan eksik ile olmaz deyû mi‘mâr-ı mezbûr ve zeyl-i kitâbda mastûrü’l-esâmi olan bî-garaz müslimîn icmâ‘ ve ittifâk ettiklerinden sonra dükkân-ı mezbûrun nakzı için mukadde[mâ] tahmîn olunan râyic fi’l-vakt altı bin akçe ihrâc olunup müste’cir-i merkūmun dükkân-ı mezbûre icâre-i mu‘accelesine mahsûb olmak üzre ancak elli bir bin yedi yüz otuz akçesi bâkī kalmağın mâ hüve’l-vâki‘ bi’t-taleb ketb olundu. Tahrîren fî evâsıtı Cumâdelûlâ sene hamsîn ve elf.
Şuhûdü’l-hâl: İbrahim Çelebi [b.] Hüsrev el-İmâm, Mehmed Halîfe b. Haydar el-Müezzin, Mustafa Bey [b.] Abdullah, Hüseyin Bey Kasab, Muslu b. Veli, Abdünnebi b. Veli, el-Hâc Mehmed b. Kadri, Mustafa b. İsa, Mustafa b. Mehmed, Ahmed b. Yusuf ve gayruhüm
|