|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 300 Hüküm no: 406 Orijinal metin no: [228-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Harap olan vakıf bahçenin kiraya mahsûben binâ yapılmak üzere kiralandığı
Havâss-ı aliyye kazâsı muzâfâtından Hasköy’de Abdüsselam mahallesi imâmı olup bahçe-i âti’z-zikre meşrûtiyyet üzre mütevellî olan Mustafa Halîfe b. Abdullah mahfil-i kazâda işbu kitâbın sâhibleri olan Dilâver Bey b. Abdullah ile mezbûr Dilâver Bey’in zevcesi olan Saliha Hâtun bt. Abdullah muvâcehelerinde ikrâr-ı tâm ve takrîr-i kelâm edip mahalle-i mezbûrede vâki‘ bir tarafdan Rıdvan Efendi mülkü ve bir tarafdan İsmihân Hâtun bt. Mustafa mülkü ve iki tarafdan tarîk-i âm ile mahdûd olup merhûme Örfî Hâtun Vakfı’ndan olup tûlen seksen arzan altmış bi-hesâb-ı şatrancî dört bin sekiz yüz zirâ‘ bahçenin cüdrânı mürûr-ı eyyâm ve kürûr-ı a‘vâm ile harâba müşrif olup arsa-i mücerrede kalıp cânib-i vakıfdan ta‘mîre vüs‘at olmayıp îcâr olunmak vakf-ı şerîfe her vechile evlâ ve enfa‘ olmağın ihdâs eyledikler[i] binâ icâre-i mu‘accelelerine mahsûb olmak üzre tevliyet-i mahkiyyem hasebiyle binâya izin verip mârrü’z-zikr bahçe yerini mezbûrân Dilâver Bey’e ve Saliha’ya iki bin akçe icâre-i mu‘accele ve senede üç yüz akçe icâre-i müeccele ile müddet-i ma‘lûmeye îcâr ve teslîm edip mezbûrân dahi vech-i muharrer üzre istîcâr ve kabz ve kabûl eylediler dedikde mütevellî-i mezbûrun minvâl-i meşrûh üzre cârî olan ikrâr ve takrîrini mezbûrân Dilâver Bey ve Saliha vicâhen tasdîk ve şifâhen tahkīk edicek mâ hüve’l-vâki‘ [bi’t-taleb ketb olundu.] Tahrîren fi’l-yevmi’l-hâmis ve’l-ışrîn min Cumâdelûlâ sene 1550.
Şuhûdü’l-hâl: Ali Beşe b. Mustafa, Hüseyin b. Ali, Mustafa b. Mehmed, Ali b. Abdullah, Mehmed Beşe b. Abdullah, Ali Beşe b. Abdullah, Sinan Beşe b. Abdullah er-Râcil, Ahmed b. Yusuf, Hüseyin b. Abdullah, Ahmed Bey Habbâz, Hüseyin Beşe b. Abdullah cebeci, Mirza b. Abdullah
|