.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 300
Hüküm no: 407
Orijinal metin no: [228-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


İsterniyos’un mülk bağını Mihal’e sattığı

Mahmiye-i Galata hârici kasaba-i Kasımpaşa tevâbi‘inden Tatavla nâm karye sükkânından İsterniyos v. Agorasti nâm Nasrâni meclis-i şer‘-i şerîf-i lâzımü’t-teşrîfde işbu sâhibü hâze’l-kitâb Mihal v. Dimitri nâm Nasrâni muvâcehesinde bi’t-tav‘i’s-sâf ikrâr ve i‘tirâf edip medîne-i Hazret-i Ebâ Eyyûb el-Ensârî muzâfâtından Hasköy sınırı bağlarında vâki‘ bir tarafı Ebûbekir Çelebi mülküyle ve bir tarafı Kiryaki nâm zimmî bağıyla ve bir tarafı Nikola v. Yorgi nâm zimmî bağıyla ve tarafı âharı dere ile mahdûd ve mümtâz olup tahmînen dört dönüm mülk bağımı ( ) nâm zimmîye eşcâr-ı müsmire ve gayr-ı müsmiresiyle mezbûr Mihal nâm zimmîye nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim, ba‘de’l-yevm zikr olunan bağ mezbûr Mihal’in mülk-i müşterâsıdır keyfemâ yeşâ ve yehtâr mutasarrıf olsun dedikde, mukırr-ı merkūmun ikrâr-ı meşrûhunu el-mukarru lehü’l-mezbûr bi’l-muvâcehe tasdîk ve tahkīk edicek [229] mâ hüve’l-vâki‘ bi’t-taleb ketb olundu. Tahrîren fî evâhiri Cumâdelûlâ sene hamsîn ve elf.


Şuhûdü’l-hâl: Mustafa Çelebi b. Mustafa, Yusuf b. Abdullah, Kosta v. Panayot, Andreya v. Keno?, Kosta v. İstemad, Yorgi v. Pavlo?, Yorgi v. Alino?