|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 303 Hüküm no: 411 Orijinal metin no: [230-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed b. Hasan’ın babasından intikal eden evinin vasîsi olan annesi Rahime Hâtun tarafından ihtiyaç olmadığı halde ve düşük fiyatla satıldığı iddiasıyla açtığı davada sulh oldukları
Havâss-ı aliyye kazâsına tâbi‘ Hasköy mahallâtından Pîrî Paşa mahallesinde sâkin Mehmed b. Hasan nâm kimesne mahfil-i kazâ[da] yine mahalle-i mezbûre sükkânından hâmil-i hâze’s-sifr Serkis v. ( ) nâm Ermeni muvâcehesinde takrîr-i kelâm ve ta‘bîr ani’l-merâm edip mahalle-i mezbûrede bir tarafı İlyas b. Mehmed mülkü ve bir tarafı Abdülbâkī mülkü ve bir tarafı Latef v. ( ) mülkü ve bir tarafı tarîk-i hâs ile mahdûd ve mümtâz olan mülk menzi[l] babam mezbûr Hasan’ın mülkü olup ba‘de vefâtihî irs-i şer‘î ile bana intikāl edip hâl-i sıgārımda kıbel-i şer‘den vasî nasb olunan vâlidem Rahime Hâtun benim nafaka ve kisveye ihtiyâcım olmayıp ve bir tarîkle bey‘ îcâb eder hâl yoğiken [233] menzil-i mezbûru noksan semen ile bi-gayr-ı vech-i şer‘î Himmet nâm kimesneye on iki bin akçeye bey‘ edip mezbûr Himmet dahi merkūm Serkis’e semen-i ma‘lûme bey‘ edip ben dahi bâliğ olmağla menzil-i mezbûru merkūm Serkis’den da‘vâ ve taleb edip ol dahi cevâbında fi’l-vâki‘ menzil-i mezbûr müteveffâ-yı mezkûrun mülkü olup lâkin düyûn-ı müsbetesi için bey‘ olunmak lâzım gelip beyne’t-tâlibîn nidâ ve müzâyede olunup rağabât-ı nâs bi’l-külliye munkatı[‘a] oldukdan sonra on iki bin akçede mezbûr Himmet üzerinde karâr edip ziyâde ile tâlib-i âhar olmamağla vasîyy-i merkūm mezkûr Himmet’e bey‘ edip mezbûr Himmet dahi bana semen-i mezkûre bey‘ eyledi, ben dahi iştirâ ve tesellüm eyledim deyû cevâb vermekle beynimizde münâza‘ât-ı kesîre ve muhâsamât-ı şedîde vâkı‘a olmuşdu, el-hâletü hâzihî tavassut-ı muslihîn ile Serkis da‘vâ-i mezkûrdan benim ile an inkâr sekiz yüz nakd-i râyic fi’l-vakt akçe üzerine inşâ’-i akd-i sulh ettikde ben dahi sulh-ı mezbûru kabûl ve bedel-i sulh olan sulh-ı mezkûr sekiz yüz akçeyi merkūm Serkis yedinden tamâmen ahz u kabz eyleyip husûs-ı mezbûre müte‘allik olan da‘vâdan merkūm Serkis’in zimmetini ibrâ-i kātı‘ü’n-nizâ‘la ibrâ ve ıskāt eyledim, ba‘de’l-yevm mazmûn-ı kitâba muhâlif benden bizzat veya bi’l-vâsıt[a] da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmasın dedikde gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Tahrîren fî evâhiri Cumâdelâhire sene hamsîn ve elf.
Şuhûdü’l-hâl: İbrahim Bey b. Yusuf el-Cündî, Mustafa Çelebi b. Abdullah er-Râcil, Hüseyin Beşe b. Abdullah er-Râcil, Mahmud b. Ahmed, Mustafa b. Mehmed hammâl, Mahmud Çelebi b. Mehmed, Ahmed b. Yusuf hammâl, Ali b. Abdullah hammâl, Ali b. Abdullah muhzır
|