|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 306 Hüküm no: 416 Orijinal metin no: [232-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Halkın şikayeti üzerine mezbelelik olan boş arâzinin temizlenmesi işinin Yako’ya verildiği
Havâss-ı aliyye kazâsına tâbi‘ Hasköy sâkinlerinden Ahmed Çelebi b. Mustafa ve İbrahim Bey b. Yusuf ve Mehmed Çelebi b. Şaban ve Ahmed Bey b. Abdullah ve Mustafa Çelebi b. Veli ve Ebûbekir b. Mustafa ve sâir ahâlî-i kasaba bi-ecma‘ihim meclis-i şer‘a hâzırûn olup kasaba-i mezbûre mahallâtından Pîrî Paşa mahallesinde sâkin râfi‘ü’l-kitâb Yako nâm Yahudi muvâcehesinde her biri takrîr-i kelâm edip mezbûr Yahudinin mahalle-i mezbûrede vâki‘ mülk menziline muttasıl bir mikdâr arz-ı hâliye mezbele olup kimesne tasarrufunda olmamağla edâ-i salât için mescid-i şerîfe varıp gelmede cümlemiz müte’ezzî olup mezbûr Yako’nun mülk menziline muttasıl olmağla ol mezbeleyi ref‘ idüp ol mahalli imâret ettiği takdîrce cemâ‘at-i müslimîn râyiha-i kerîheden müsterîh olmak emr-i mukarrer olmağın mezbûr Yako’ya taraf-ı şer‘den ol mahallin ta‘mîrine izin verilmek matlûbumuzdur dediklerinde minvâl-i muharrer üzre merkūm Yako’ya izin verilip mâ vaka‘a bi’t-taleb ketb olundu. [Tahrîren] fî evâsıtı Saferi’l-hayr li sene selâsin ve hamsîn ve elf.
Şuhûdü’l-hâl: Ahmed Ağa b. Abdullah, Ramazan Bey b. Abdullah, Ahmed Çelebi b. Mustafa, Pîrî b. Rıdvan, Hüseyin b. Mustafa, Ali el-muhzır
|