.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 308
Hüküm no: 420
Orijinal metin no: [234-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hanka v. Yasef’in evini ve bahçesini kardeşi İlya’ya sattığı

Havâss-ı aliyye kazâsına tâbi‘ Hasköy mahallâtından el-Hâc Şaban mahallesinden sâkin Yahudi tâ’ifesinden Hanka v. Yasef nâm Yahudi mahfil-i kazâda li ebeveyn karındaşı İlya nâm Yahudi muvâcehesinde bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafı Arslan nâm Yahudi mülkü ve bir tarafı bâyi‘-i mezbûr mülkü ve iki tarafı tarîk-i âm ile mahdûd ve mümtâz olan bir bâb fevkānî ve iki bâb tahtânî mülk menzili ve hudûd-ı mezkûr dâhilinde vâki‘ ve tûlen elli zirâ‘ ve arzan yirmi zirâ‘ mülk bahçemi mezbûr İlya’ya on beş sikke-i haseneye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim, ba‘de’l-yevm zikr olunan [menzil] ve bahçe mezbûr İlya’nın mülk-i müşterâsıdır, keyfemâ yeşâ ve yehtâr mutasarrıf olsun dedikde mukırr-ı merkūmun ikrâr-ı meşrûhunu el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb [olundu.] Tahrîren fî evâhiri Cumâdelâhire li sene hamsîn ve elf.


Şuhûdü’l-hâl: İbrahim Çelebi b. Mustafa Debbağzâde, Mehmed b. Bilal, Hasan Çelebi b. Mustafa, Ali b. Abdullah, Yasef v. Mosi Marol ?, Kalef v. Baroh, Sinan v. Salamon, Yahudanho v. Menahim ve diğer Menahim v. Hanka ve Salamon v. Menahim, İlyaho v. Murdehay