.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 308
Hüküm no: 421
Orijinal metin no: [234-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


İsmihânî bt. Ömer’in babasından miras kalan dükkânın vasîsi olan annesi Aynî Hâtun tarafından ihtiyaç olmadığı halde satıldığı iddiasıyla Mehmed b. Bilal’den iade davası açtığı ve sulh oldukları

Havâss-ı aliyye kazâsına tâbi‘ Hasköy mahallâtından Pîrî Paşa mahallesinde sâkine İsmihânî bt. Ömer nâm hâtun mahfil-i kazâda işbu râfi‘ü’l-kitâb Mehmed b. Bilal nâm kimesne mahzarında takrîr-i kelâm edip mahalle-i mezbûrede vâki‘ iki tarafı Pîr Mehmed Paşa Vakfı bir tarafı lebideryâ ve bir tarafı tarîk-i âm ile mahdûd ve mümtâz olan bir bâb debbağhâne dükkânı babam mezbûr Ömer’in tasarrufunda mülkü olup ba‘de vefâtihî irs-i şer‘î ile bana intikāl edip hâl-i sıgārımda kıbel-i şer‘den vasî nasb olunan vâlidem Aynî Hâtun benim nafaka ve kisveye ihtiyâcım olmayıp ve bir tarîkle bey‘ îcâb eder hâl yoğiken dükkân-ı mezbûru noksan semen ile bi-gayr-ı vech-i şer‘î merkūm Mehmed’e dört bin iki yüz akçeye bey‘ edip ben dahi bâliğa olmağla [235] dükkânı mezbûru merkūm Mehmed’den da‘vâ ve taleb edip ol dahi cevâbında fi’l-vâki‘ dükkân-ı mezbûr müteveffâ-yı mezkûrun tasarrufunda lâkin nafaka ve kisvesi için bey‘ olunmak lâzım gelip beyne’t-tâlibîn nidâ ve müzâyede olunup rağabât-ı nâs bi’l-külliye munkatı‘a oldukdan sonra benim üzerimde dört [bin] iki yüz akçede karâr edip ziyâde ile tâlib-i âhar olmamağla vasîyy-i merkūm bana semen-i mezkûre bey‘ eyledi, ben dahi iştirâ ve tesellüm eyledim deyû cevâb vermekle beynimizde münâza‘ât-ı kesîre ve muhâsamât-ı şedîde vâkı‘a olmuşdu el-hâletü hâzihî beynimizde tavassut-ı muslihîn ile da‘vâ-yı mezkûrdan benim ile an inkâr nakd-i râyic fi’l-vakt bin akçe üzerine inşâ’-i akd-i sulh ettikde ben dahi sulh-ı mezbûru kabûl ve bedel-i sulh olan sulh-ı mezkûr bin akçeyi merkūm Mehmed yedinden tamâmen ahz u kabz eyleyip husûs-ı mezbûra müte‘allik olan da‘vâdan merkūm Mehmed’in zimmetini ibrâ-i katı‘u’n-nizâ‘ile ibrâ ve ıskāt eyledim, ba‘de’l-yevm mazmûn-ı kitâba muhâlif benden bizzat veya bi’l-vâsıta da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmasın dedikde gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Tahrîren fî evâhiri Cumâdelâhire sene hamsîn ve elf.


Şuhûdü’l-hâl: İbrahim Çelebi b. Mustafa Debbağzâde, Mustafa Halîfe b. Surûrî el-İmâm, Mustafa Bey [b.] Nasuh, el-Hâc Ali [b.] Abdülvehhâb, Mehmed Bey [b.] Mustafa, Mustafa b. Abdullah, Mustafa b. Hasan, Ali b. Abdullah