.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 309
Hüküm no: 422
Orijinal metin no: [235-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mehmed ve Âlime’ye babalarının tasarrufunda olup miras yoluyla intikal eden dükkândaki hisselerinin vasîleri olan kardeşleri Mustafa tarafından ihtiyaç olmadığı halde satıldığı, iadesi için dava açtıkları ve sulh oldukları

Havâss-ı aliyye kazâsına tâbi‘ Hasköy mahallâtından Pîrî Paşa mahallesinde sâkin Mehmed b. Hasan ve li ebeveyn kız karındaşı Âlime nâm hâtun mahfil-i kazâda Pîrî Mehmed Paşa Vakfı’na bi’l-fi‘il mütevellî olan Zuhûrî Efendi b. [D]erviş mahzarında takrîr-i kelâm ve ta‘bîr ani’l-merâm edip Havâss-ı aliyye kazâsına tâbi‘ Hasköy mahallâtından Pîrî Paşa mahallesinde vâki‘ bir tarafı Receb b. ( ) mülkü ve bir tarafı lebideryâ ve bir tarafı kiremitlik ve bir tarafı tarîk-i âm ile mahdûd ve mümtâz olan bir bâb debbağ dükkânı vakf-ı mezbûrdan olup icâre-i mu‘accele ve müeccele ile babamız mezbûr Hasan’ın tasarrufunda olup ba‘de vefâtihî ikimize ve gāib ani’l-meclis olan karındaşımız Mustafa’ya intikāl edip hâl-i sıgārımızda kıbel-i şer‘den vasî nasb olunan karındaşımız mezbûr Mustafa nâm kimesne bizim nafaka ve kisveye ihtiyâcımız olmayıp bir tarîkle bey‘ îcâb eder hâl yoğiken dükkân-ı mersûmu noksan semen ile bi-gayr-ı vech-i şer‘î Mustafa nâm kimesneye semen-i ma‘lûme bey‘ eyleyip merkūm Mustafa fevt olmağla sadriye kızı ( ) intikāl edip ve ba‘de vefâtihâ vakfa intikāl etmeğin, biz bâliğa olmağla dükkân-ı mezbûrun sülüsânını mütevellî-i merkūmdan da‘vâ ve taleb eylediğimizde mütevellî-i merkūm dahi cevâbında fi’l-vâki‘ dükkân-ı mezbûr merkūmân Âlime ve Mehmed’in nafaka ve kisvesi için [236] bey‘ olunmak lâzım gelip beyne’t-tâlibîn müzâyede olunup rağabât-ı nâs munkatı‘a oldukdan sonra dört bin akçede müteveffâ-yı mezbûr Mustafa’nın üzerinde karâr edip ziyâde ile tâlib-i âharı olmamağla vasîyy-i merkūm müteveffâ-i mezkûre semen-i ma‘lûme bey‘ eyledi deyû cevâb vericek beynimizde münâza‘ât-ı kesîre ve muhâsamât-ı şedîde vâkı‘a olmuşdu el-hâletü hâzihî tavassut-ı muslihîn ile mezbûr Zuhûrî Efendi da‘vâ-yı mezkûrdan benim ile an inkâr iki bin elli nakd-i râyic fi’l-vakt akçe üzerine inşâ’-i akd-i sulh eyledikde, ben dahi sulh-ı mezkûru kabûl ve bedel-i sulh olan iki bin elli [akçeyi] merkūm Zuhûrî yedinden tamâmen ahz u kabz eyleyip husûs-ı mezbûre müte‘allik olan da‘vâdan mezbûr Zuhûrî Efendi’nin zimmetini ibrâ-i katı‘u’n-nizâ‘la ibrâ ve ıskāt eyledim ba‘de’l-yevm mazmûn-ı kitâba muhâlif benden bizzat veya bi’l-vâsıta da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmasın dedikde gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Tahrîren fî evâili Recebi’l-ferd li sene hamsîn ve elf.


Şuhûdü’l-hâl: İbrahim Çelebi b. Mustafa Debbağzâde, el-Hâc Ali b. Abdülvehhâb, Ahmed Çelebi b. Muslu, İbrahim Bey b. Yusuf el-Cündî, Mehmed b. Bilal, Hüseyin Bey b. Timur, Ali Çelebi b. Haydar ve gayruhüm mine’l-hâzırîn