.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 310
Hüküm no: 423
Orijinal metin no: [236-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Bahâdır v. Aznavur’un Eğin’deki mülk bağını Emircan v. Serkis’e satıp bedelini tahsil ettiği

Vilâyet-i Anadolu’da vâki‘ Eğin kazâsına tâbi‘ Gemürgâp nâm karye sükkânından Bahâdır v. Aznavur nâm Ermeni meclis-i şer‘-i hatîr-i lâzımü’t-tevkīrde işbu bâ‘is-i hâze’s-sifr Emircan v. Serkis nâm Ermeni muvâcehesinde bi’t-tav‘i’s-sâf ikrâr ve takrîr-i kelâm edip silk-i mülkümde münselik olup karye-i mezbûrede vâki‘ bir tarafdan Ogasib v. Serkis mülkü ve bir tarafdan Ağacan v. Harabet mülkü ve bir tarafdan Bayram Beşe b. Ahmed mülkü ve bir tarafdan tarîk-i âm ile mahdûd ve mümtâz olup tahmînen iki dönüm bir kıt‘a mülk bağımı mezbûr Emircan’a tâmmü’l-vezn otuz altı riyâlî guruşa bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve mebî‘-i mezbûru mahallinde kabza taslît eyledim, ba‘de’l-yevm zikr olunan bağ mezbûr Emircan’ın mülk-i müşterâsıdır keyfemâ yeşâ ve yehtâr mutasarrıf olsun dedikde mukırr-ı merkūmun [237] ikrâr-ı meşrûhunu el-mukarru lehü’l-mezbûr Emircan bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Recebi’l-ferd li sene hamsîn ve elf.


Şuhûdü’l-hâl: Arzhan? v. Hazar, Onnes v. Emircan, Asuzader? v. İskender, Yakob v. Mircan, Yakob v. Harabet