|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 311 Hüküm no: 424 Orijinal metin no: [237-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yasemin Hâtun Vakfı’na ait evin geliriyle iki odayı tamir etmek için Mehmed Efendi’ye kiraya verilerek muaccelesinin tahsil edildiği
Havâss-ı aliyye kazâsına tâbi‘ Hasköy mahallâtından Sütlüce mahallesinde vâki‘ merhûme Yasemin Hâtun Vakfı’na bi’l-fi‘il mütevellî olan Mehmed Bey b. İbra[him] meclis-i şer‘-i şerîf-i lâzımü’t-teşrîfde işbu râfi‘ü’l-kitâb Mehmed Efendi b. ( ) el-İmâm mahzarında ikrâr ve takrîr-i kelâm edip karye-i mezbûrede vâki‘ bir tarafı Yusuf b. Abdullah mülkü ve ba‘zan Şahin Bey mülkü ve bir tarafı es-Seyyid Yahya mülkü ve bir tarafı Bayram b. Abdullah mülkü ve bir tarafı mekābir-i müslimîn ile mahdûd ve mümtâz olup üç bâb tahtânî odayı ve bir dehlizi ve bir bi’r-i mâ’ı ve bir mikdâr bahçeyi müştemil olan menzil mezbûre Yasemin Hâtun’un vakfından olup süknâsı merhûm Mahmud Ağa Câmi‘-i şerîfi’nde müezzin olan kimesnelere şart olunup lâkin mürûr-ı eyyâm ve kürûr-ı şuhûr-i a‘vâm ile harâba müşrif olmağın zikr olunan üç bâb odadan bir bâb tahtânî odayı ve dehlizi ve bi’r-i mâ’ın nısfını ve sokak tarafında olan bir mikdâr bahçeyi icâre-i mu‘accele ve müeccele ile îcâr edip ve icâresinden hâsıl olan meblağ bâkī kalan iki bâb odanın ta‘mîr ve termîmine harc-ı sarf olunmak her vechile vakfa evlâ ve enfa‘ olup ve cânib-i şer‘den …? olduğum cihetden tevliyet-i mahkiyyem hasebiyle zikr olunan bir bâb odayı ve dehlizi ve bi’r-i mâ’ın nısfını mûmâ-ileyh Mehmed Efendi’ye dört bin akçe icâre-i mu‘accele ve yevmî bir akçe icâre-i müeccele ile îcâr edip meblağ-ı mezbûr dört bin akçeyi merkūm Mehmed Efendi yedinden bi-tamâmihî ahz u kabz eyledim, mâdem ki ba‘de’l-yevm vakf-ı mezbûr için ta‘yîn olunan yevmî bir akçeyi icâre-i müeccelesini edâ ve teslîm eyleye keyfemâ yeşâ ve yehtâr mutasarrıf olsun dedikde mukırr-ı merkūmun ikrâr-ı meşrûhunu el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk edicek [mâ hüve’l-vâki‘ bi’t-taleb ketb olundu.] Tahrîren fî gurreti Recebi’l-ferd sene hamsîn ve elf.
Şuhûdü’l-hâl: Mehmed Efendi b. Hızır el-İmâm, Mustafa Halîfe b. Surûrî el-İmâm, Hüseyin Çelebi b. Cafer, el-Hâc Mehmed b. Abdullah, İbrahim Efendi b. Hüsrev el-Hatîb, Ebûbekir b. Çelebi Mehmed, Mehmed hammâmî, Mehmed b. Abdullah, Ali b. Abdullah, Yusuf b. …?, Bayram b. Mustafa ve gayruhüm
|