.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 312
Hüküm no: 425
Orijinal metin no: [238-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Gur v. Menahim’in evini Simon’a sattığı

Havâss-ı aliyye kazâsına tâbi‘ Hasköy mahallâtından Keçeciler mahallesinde sâkin Yahudi Gur v. Menahim nâm Yahudi meclis-i şer‘-i hatîr-i lâzımü’t-tevkīrde işbu hâmilü’l-kitâb Simon v. İsak Alof? nâm Yahudi muvâcehesinde bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafı Agop v. Vakyel mülkü ve etrâf-ı selâsesi tarîk-i âm ile mahdûd olup üç bâb fevkānî odayı ve bir matbahı ve üstünde köşkü ve kenîfi ve iki bâb tahtânî beyti ve dehlizi ve matbahı ve iki mahzeni ve kenîfi ve köşkü ve bi’r-i mâ’ı ve eşcâr-ı müsmire ve gayr-ı müsmireyi hâvî muhavvatayı hâvî olan mülk menzilimi cümle tevâbi‘ ve levâhıkı ve âmme-i menâfi‘ ve merâfıkı ile mesfûr Simon’a sekiz yüz riyâlî guruşa bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim, ba‘de’l-yevm menzil-i mahdûd mezkûr Simon’un mülk-i müşterâsıdır, keyfemâ yeşâ ve yehtâr mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini mukarrun lehü’l-mezbûr Simon bi’l-muvâcehe tasdîk ve bi’l-müşâfehe tahkīk ettikden sonra menzil-i mezbûrun derkine merkūm Yahudi Gur’un zevcesi Efendepula v. Zâriye ve merkūme Efendepula’nın li ebeveyn kız karındaşı Handi nâm Yahudiyyeler emr-i kabûlü hâvî kefâlet ile kefîl olmağın mâ hüve’l-vâki‘ bi’t-taleb ketb olundu. Tahrîren fî evâili Şa‘bâni’l-mu‘azzam li sene hamsîn ve elf.


Şuhûdü’l-hâl: Mahmud Çelebi b. Mehmed es-Serrâc, Mehmed Halîfe b. İbrahim el-Müezzin, Mehmed Bey b. Mustafa bevvâb, Ali b. Abdullah, Haham Hemon, Yahudi v. Sefoviye, Kemal v. Papole, İlya v. Baroh, Hanka v. Yasef