|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 313 Hüküm no: 427 Orijinal metin no: [239-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Libro v. Manol’un Serkis’e içki alışverişinden olan borcunu ödediği halde Serkis tarafından rahatsız edildiği, men edilmesi
Kuyumcu tâ’ifesinden Libro v. Manol nâm zimmî mahfil-i kazâda Havâss-ı aliyye kazâsına tâbi‘ Hasköy’de meyhâneci tâ’ifesinden Serkis v. Virek nâm zimmî muvâcehesinde takrîr-i da‘vâ edip mezbûr Serkis’e cihet-i karz-ı şer‘îden iki bin beş yüz akçe deynim olup meblağ-ı mezbûr iki bin beş yüz akçe için mezbûr Serkis’e hamr verip ba‘de küll-i hesâb biribirimizin zimmetini ibrâ ve ıskāt eylediğimizden sonra mezbûr Serkis mu‘ârazadan hâlî değildir, suâl olunup takrîri tahrîr olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûr Libro’dan cevâbına mutâbık beyyine taleb olundukda karye-i mezkûrede sâkin Dido v. Nikola ve Estat? v. Simo? nâm zimmîler meclis-i şer‘a hâzırân olup gıbbe’l-istişhâd mezbûrlar cevâblarında fi’l-hakīka merkūm Libro’nun zimmetinde olan iki bin beş yüz akçe için mezbûr Serkis’e hamr verip ba‘de küll-i hesâb bizim huzûrumuzda biribirlerinin zimmetlerini ibrâ ve ıskāt eylediler, biz bu husûsa şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde şehâdetleri hayyiz-i kabûlde vâkı‘a olmağın mezbûr Serkis mu‘ârazadan men‘ birle mâ hüve’l-vâki‘ bi’t-taleb ketb olundu. Tahrîren fî evâili Ramazâni’l-mübârek li sene hamsîn ve elf.
Şuhûdü’l-hâl: Memi b. Abdullah, İbrahim Beşe b. Abdullah, Ali b. Abdullah, Andreya v. Todori
|