|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 313 Hüküm no: 428 Orijinal metin no: [240-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Zamâne bt. Abdullah’ın zevci Halil b. İbrahim’den muhâlaa ile boşandığı
Ebû Eyyûb el-Ensârî -aleyhi rahmetü Rabbihi’l-Bârî- tevâbi‘inden Hasköy karyesinden ( ) mahallesinde sâkine Zamâne bt. Abdullah nâm hâtun tağyîr ve tahrîfden korunmuş olan meclis-i şer‘-i şerîf ve mahfil-i dîn-i münîfde hâmil-i hâze’l-kitâb zevci Halil b. İbrahim ile muhâla‘a oldukda ol dahi onunla nikâhlarında ma‘kūdun aleyh olan mikdârı ve nisâbı râyic fi’l-vakt beş yüz akçe fıddî olan mehr-i müecceli ve aralarında ilm-i şer‘î ile mukaddere ve ma‘lûme olan nafaka-i iddeti mukābilinde muhâla‘a-i sahîha-i şer‘iyye oldukda akd-i cedîd ve sadâk-ı müste’nef olmaksızın kendisine helâl olmayacak şekilde bâyin olmuş oldukdan sonra her biri âharın zimmetini de‘âvî ve husûmâtdan [umûmen ve husûsan] hukūk-ı zevciyyete müte‘allik de‘âvîden ibrâ-i âmm-ı kātı‘ü’n-nizâ‘ ve râfi‘ün li’ş-şikāk ile ibrâ ettiler. Cerâ zâlike ve hurrire fi’l-yevmi’s-sâdis aşer min Ramazâni’l-mübârek sene hamsîn ve elf.
Şuhûdü’l-hâl: Receb b. İbrahim, Mehmed Beşe b. Hasan er-Râcil, Mehmed b. Şaban, Ali b. Abdullah, Receb b. Zülfikar ve gayruhüm
|