.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 314
Hüküm no: 429
Orijinal metin no: [240-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Safiye Hâtun’un borcuna karşılık mescide vakfettiği halıyı alan Mustafa Halîfe’nin halıyı mescide iadesi

Havâss-ı aliyye kazâsına tâbi‘ Hasköy mahallâtından Keçeciler mahallesi sükkânından Ömer Beşe b. ( ) ve Mehmed b. Mustafa ve Mustafa Çelebi b. Mirza ve sâirleri mahfil-i kazâda mahalle-i mezbûrede vâki‘ mescid-i şerîfde imâm olan Mustafa Halîfe [b.] Surûrî mahzarında her biri üzerine takrîr-i da‘vâ eyleyip bundan akdem vefât eden Safiye Hâtun bir kıt‘a halı vakfedip zikr olunan mescid-i şerîfe döşeyip bir yıl mikdârı üzerinde müslümânlar namaz kıldıkdan sonra mezbûr Mustafa Halîfe mezbûr halıyı mescid-i merkūmdan ahz u kabz eylemişdir ve vermeye te‘allül eder, suâl olunup zikr olunan vakıf halıyı alıp mârrü’z-zikr mescid-i merkūme döşenmesi matlûbumuzdur dediklerinde, gıbbe’s-suâl mezbûr Mustafa Halîfe cevâbında mersûme Safiye Hâtun’un bana üç bin akçe deyni mukābelesinde zikr olunan halıyı ahz u kabz eyledim, vakıf olduğu ma‘lûmum değildir deyû vakıf olduğunu münkir olıcak müdde‘iyyûn-ı mezbûrûndan da‘vâlarına mutâbık beyyine taleb olundukda udûl-i müslimînden olup karye-i mezkûre sükkânından Ali b. Mehmed ve Kubad b. Mustafa nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd mezbûrlar cevâblarında fi’l-hakīka merkūme Safiye Hâtun mârrü’z-zikr halıyı bizim huzûrumuzda vakf[edip] ve mescid-i şerîfe döşeyip bir yıl mikdârı müslümânlar üzerinde namaz kıldılar deyû her biri edâ-i şehâdet-i şer‘iyye ettiklerinde ba‘de ri‘âyeti şerâ’iti’l-kabûl şehâdetleri hayyiz-i kabûlde vâkı‘a olmağın mezbûr Mustafa Halîfe’ye mârrü’z-zikr vakıf halıyı mescid-i merkūme döşemesine tenbîh birle mâ hüve’l-vâki‘ bi’t-taleb ketb olundu. Tahrîren fî evâsıtı Ramazâni’l-mübârek sene hamsîn ve elf.


Şuhûdü’l-hâl: Mustafa Efendi b. Resul, Mahmud Çelebi b. Mirza es-Serrâc, Hüseyin Bey [b.] Pehlivan el-Cündî, Hüseyin b. Abdullah ve gayruhüm