|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 318 Hüküm no: 431 Orijinal metin no: [242-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mustafa b. Abdullah’ın Mustafa Beşe b. Hamza’ya bir yeni pereme sattığı ve bedelinin bir kısmını tahsil ettiği, kalanının taksitle ödeneceği
Mahmiye-i Kostantıniyye mahallâtından Hoca Ali mahallesi sâkinlerinden işbu râfi‘ü’l-kitâb Yeniçeri tâ’ifesinden fahr-i akrânihî ve zahr-ı emsâlihî Mustafa Beşe b. Hamza nâm kimesne meclis-i şer‘-i şerîf-i lâzımü’t-tevkīrde Havâss-ı aliyye muzâfâtından Hasköy mahallâtından Turşucu mahallesi sâkinlerinden Peremeci Mustafa b. Abdullah nâm kimesne mahzarında takrîr-i kelâm edip mezbûr Mustafa’ya zeyl-i kitâbda mastûrü’l-esâmi olan müslümânlar huzûrunda bir yeni peremeyi iki küreği ile dört bin dokuz yüz akçeye bey‘ edip teslîm-i mebî‘ eyledim ve meblağ-ı mezkûrdan yedi yüz akçesin bin elli Şevvâlinin yirminci gününe değin edâ eyleyip bâkī dört bin iki yüz akçesini her ay eyyâm-ı şitâda yüz elli akçe ve eyyâm-ı sayfda iki yüz akçe vermek üzre taksît eyledim, meblağ-ı mezkûr tamâm oluncaya dek dedikde, mezbûr Mustafa b. Abdullah dahi minvâl-i meşrûh üzre her ay tamâmında meblağ-ı mukāssat edâya ta‘ahhüd etmeğin hâzihi’l-vesîka bi’t-taleb ketb olundu. Tahrîren fî evâili Şevvâli’l-mükerrem sene hamsîn ve elf.
Şuhûdü’l-hâl: Mustafa b. Halil, Mahmud Kethüdâ-i peremeciyân-ı Hasköy, Hüseyin kethüdâ-i peremeciyân an Balat, Mehmed b. Abdullah, Hüseyin b. Abdullah ve gayruhüm
|