.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 319
Hüküm no: 432
Orijinal metin no: [242-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mosi v. Salamon’dan ödünç alınan paranın yedi ay sonra ödeneceği

Havâss-ı aliyye muzâfâtından Hasköy mahallâtından Abdüsselam mahallesi sükkânından Misak v. Serkis, Parihân v. Gülâz, Arzhan v. Civan nâm ermeniler meclis-i şer‘-i şerîf-i lâzımü’t-tevkīrde nefs-i Hasköy sâkinlerinden Kadiz cemâ‘atinden bâ‘isü’l-kitâb Mosi v. Salamon nâm Yahudi mahzarında ikrâr edip mezbûr Mosi’den üç yüz altmış riyâlî guruş istikrâz eyledik, vâcibü’l-edâ deynimizdir târih-i kitâb[dan] [243] yedi ay mürûrundan sonra dek iki yüz on gün eder, edâ etmeğe ve her birimiz biri birimizin nefsine ve meblağ-ı mezkûrun edâsına kefîl bi’l-mâl olmuşuzdur dediklerinde, mezbûr Mosi dahi mukırrûn-u mezkûrûn[un] vech-i meşrûh üzre vâki‘ olan ikrârlarını bi’l-muvâcehe tasdîk ve bi’l-müşâfehe tahkīk etmeğin hıfzan li’l-makāl bi’t-taleb ketb olundu. Tahrîren fî evâhiri Şevvâl sene hamsîn ve elf.


Şuhûdü’l-hâl: Fahrü’l-e’immeti’l-kirâm Mehmed Efendi el-İmâm, Ahmed Çelebi el-mutasarrıf alâ Hamam-ı Pîrî Paşa, Hasan b. ( ) er-Râcil, İbrahim Bey el-Cündî, Mustafa Halîfe el-İmâm, Ali el-muhzır, Sehar v. Şehab, Ferhad v. Evedik, Kaspar v. Varkin ve gayruhüm