.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 320
Hüküm no: 435
Orijinal metin no: [243-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Nikola’nın Kiraki’den aldığı borcun bir kısmını ödediği, kalanını da imkânı oldukça ödeyeceği ve babası ile kardeşinin borcun ödenmesine kefil oldukları

Mahmiye-i Kostantıniyye mahallâtından Mustafa Paşa mahallesi sükkânından Nikola v. Todori nâm zimmî meclis-i şer‘-i şerîf-i lâzımü’t-tevkīrde Havâss-ı aliyye muzâfâtından nefs-i Hasköy sâkinlerinden meyhâneci tâ’ifesinden Kiraki v. Yani nâm zimmî mahzarında ikrâr [ve] i‘tirâf [edip] mezbûr Kiraki’den dört bin akçe râyic fi’l-vakt istikrâz eyledim, vâcibü’l-edâ [ve] lâzımü’l-kazâ deynimdir ve meblağ-ı mezkûrun bin beş yüz akçesini dahi târih-i kitâbdan yetmiş beş gün mürûrundan sonra edâ edip bâkī iki bin beş yüz akçeyi dahi tedrîc ile mûsir oldukça edâ olunmak şartı üzre dedikde mezbûr Kiraki dahi mukırr-ı mezbûrun vech-i muharrer üzre vâki‘ olan ikrârını bi’l-müşâfehe tasdîk [244] ettikden sonra i‘âde-i kelâm edip meblağ-ı mezkûra işbu hâzır bi’l-meclis medyûn-ı mezkûrun babası Todori ve yine karındaşı Manol kefâlet-i sahîha-i şer‘iyye ile kefîl bi’l-mâl olmuşlardır dedikde gıbbe’s-suâl mezbûr Todori ve Manol meblağ-ı mezkûru edâya kefâlet-i sahîha-i şer‘iyye ile kefîl olduk dediklerinde vâki‘u’l-hâl hıfzan li’l-makāl bi’t-taleb ketb olundu. Tahrîren fî gurreti Zilka‘deti’ş-şerîfe sene hamsîn ve elf.


Şuhûdü’l-hâl: Dilâver b. Abdullah el-Muhtesib, Ömer b. Abdullah, Ali el-muhzır, Yani v. Simo, Nikola v. Yorgi, Asnad v. İstemad, Mihonik v. Niko, Seralva? v. İstemad ve gayruhüm