.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 321
Hüküm no: 436
Orijinal metin no: [244-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Âişe bt. Ahmed’in kocası tarafından iki talâk ile boşandığı, ama üç talâkın gerçekleşmediği

Budur ki Havâss-ı aliyye muzâfâtından Kağıthâne nâm karye sâkinlerinden Âişe bt. Ahmed nâm hâtunun tarafından nehc-i şer‘î üzre husûs-ı âti’l-beyâna vekâleti sâbite olan Mehmed Çelebi b. Ömer nâm kimesne meclis-i şer‘-i şerîf-i lâzımü’t-tevkīrde yine karye-i mezbûre sükkânından işbu hâfız-ı hâze’l-kitâb fahr-i akrânihî ve zahr-ı emsâlihî Receb Bey b. Ali mahzarında bi’l-vekâle takrîr-i kelâm ve ta‘bîr ani’l-merâm edip mezbûr Receb Bey müvekkil[e]m olan Âişe nâm hâtun[u] mukaddemâ hul‘ edip talâk-ı bâyin ile mutallaka olup ba‘de’l-akd yine talâk-ı vâhid ile tatlîk edip ba‘de’l-akd yine hul‘ edip bu takdîrce talâk-ı selâse ile mutallakası olup vekâletim hasebi ile müvekkilem Âişe’nin iki bin akçe mehr-i müeccelini taleb ederim dedikde, gıbbe’s-suâl mezbûr Receb Bey cevâbında fi’l-hakīka mezbûr Âişe ile iki def‘a hul‘ ettim, lâkin talâk-ı vâhid ile tatlîk etmedim deyû münkir olmağın vekîl-i mezbûrun sıdk-ı da‘vâsına mutâbık beyyine taleb olunup ityân-ı beyyineden izhâr-ı acz etmeğin mezbûr Receb Bey iki def‘a hul‘dan gayrı talâk-ı vâhid ile tatlîk etmediğine yemîn teklîf olundukda anlar dahi alâ vefki’s-suâl yemîn billâhi te‘âlâ etmeğin hâzihi’l-vesîkatü’l-enîka bi’t-taleb ketb olundu. Tahrîren fî evâili Zilka‘deti’ş-şerîfe sene hamsîn ve elf.


Şuhûdü’l-hâl: Fahrü’l-müderrisîn Ramazan b. Süleyman, Fahrü’l-e’immeti’l-kirâm Yusuf b. Behram, Mehmed b. Hasan, Süleyman Çelebi b. Ali el-Müezzin, Hasan b. Ali el-Müezzin, Ali el-muhzır, Ali Çelebi b. Süleyman er-Râcil ve gayruhüm