.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 322
Hüküm no: 437
Orijinal metin no: [244-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Istabl-ı âmire Mescidi Evkâfı mütevellîsi Mahmud Bey’in görevini mescidin imamı Mustafa b. Ramazan’a devrettiği

Budur ki Havâss-ı aliyye kazâsına tâbi‘ Hasköy’de vâki‘ Istabl-ı âmire Mescidi Evkāfı’na mütevellî olan Mahmud Bey b. Mehmed nâm serrâc-ı sultânî meclis-i şer‘de mescid-i mezbûr imâmı Mustafa b. Ramazan mahzarında ikrâr [ve] i‘tirâf edip tevliyet-i mezbûrun hizmeti lâzımesini edâya kādir olmamağın mezbûr Mustafa Efendi’ye hüsn-i ihtiyârım ile fâriğ olup mescid-i mezbûrun evkāf-ı müteferrikasından zimmetimde te‘âtîsi memnû‘ olan hurda akçe ile on dört bin akçe olup ve bir mikdâr dahi murâbahasından fâiz olup beher riyâlî guruş seksener akçe hesâbı üzre on iki bin akçe teslîm eyledim dedikde, mezbûr Mustafa Efendi dahi tevliyet-i mezbûrun hizmet-i lâzımesini edâya ta‘ahhüd ve meblağ-ı mezkûru mezbûr Mahmud Bey yedinden bi’t-tamâm ve’l-kemâl ahz u kabz eylediğini vicâhen tasdîk etmeğin hâzihi’l-vesîka bi’t-taleb ketb olundu. Tahrîren fî evâhiri Zilka‘deti’ş-şerîfe sene hamsîn ve elf.


Şuhûdü’l-hâl: Ahmed Ağa Kethüdâ-i hâssa, Ahmed Çelebi serrâc-ı sultânî …?, Mehmed b. İbrahim el-Müezzin, Mehmed Efendi b. Mustafa el-İmâm, Ahmed Efendi el-İmâm bi-mescidi el-Hâc Şaban, Mehmed Çelebi b. Ahmed Ağa el-Cündî, Osman b. Mustafa serrâc-ı sultânî, Abdi Bey b. Şaban serrâc-ı sultânî, Mustafa b. Halil serrâc-ı sultânî, Ahmed Çelebi b. Mustafa el-Hammâmî, Ali Dede b. Hüseyin, Hüseyin b. Ali, Halil Bey b. Şükrullah, Hüseyin b. Abdullah, Ali serbölük, Sefer serbölük, Mehmed serbölük ve gayruhüm