|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 322 Hüküm no: 438 Orijinal metin no: [245-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Istabl-ı âmire Mescidi Evkâfı’nın mütevellîliğini devralan İmam Mustafa’nın önceki mütevellîden vakfın mal varlığını devr alıp zimmetini ibrâ ettiği
Havâss-ı aliyye kazâsına tâbi‘ Hasköy’de vâki‘ Istabl-ı âmire Mescidi Evkāfı’na mütevellî olan Mustafa Efendi b. Ramazan nâm kimesne meclis-i şer‘de yine Hasköy mahallâtından Ahmed Çelebi mahallesi sükkânından Mahmud Bey b. Mehmed nâm serrâc-ı sultânî mahzarında bi’t-tav‘i’s-sâf ikrâr [ve] i‘tirâf edip mez[bûr] Mahmud Bey bundan akdem mescid-i mezkûr evkāfına mütevellî olup hîn-i tevliyetten târih-i kitâba gelince asl-ı mâl-ı vakıfdan ve eğer murâbahasından cemî‘sini mezbûr Mahmud Bey yedinden ahz u kabz eyledim, zimmetini ibrâ-i âm ile ibrâ eyledim ba‘de’l-yevm vakf-ı mezbûrun mâlına ve eğer murâbahasına müte‘allik benden veya vekîlimden da‘vâ sudûr ederse inde’l-hükkâmi’l-kirâm mesmû‘a olmasın dedikde mezbûr Mahmud dahi minvâl-i meşrûh üzre kelâmını tasdîk etmeğin hâzihi’l-vesîka bi’t-taleb ketb olundu. Tahrîren fî evâhiri Zilka‘deti’ş-şerîfe sene 1050.
Şuhûdü’l-hâl: es-Sâbıkūn
|